Stutt athugasemd Þar sem mér var kennt að maður skyldi alltaf þakka fyrir sig, geri ég það hér með og þakka sr. Erni Bárði Jónssyni fyrir svar við fyrirspurn minni frá 16. júlí, sem Velvakandi sá ástæðu til að endurtaka þann 26. júlí.

Stutt athugasemd

Þar sem mér var kennt að maður skyldi alltaf þakka fyrir sig, geri ég það hér með og þakka sr. Erni Bárði Jónssyni fyrir svar við fyrirspurn minni frá 16. júlí, sem Velvakandi sá ástæðu til að endurtaka þann 26. júlí. Þar var spurt um hvort það væri ekki rétt skilið að prestar væru mannasættar, en ég fæ ekki séð að komið hafi svar við því.

Til stuðnings málstað sínum vísar presturinn til Jesú Krists og spámanna, sem sagan hermir að hafi verið uppi fyrir 2000 árum. Og þessir menn eiga trúlaga að réttlæta gerðir hans á hinum "prúðmannlega" fundi við Alþingishúsið fyrir skömmu.

Mér finnst það talsvert langsótt að vera að líkja sér við spámenn fyrir 2000 árum - og sjálfan Jesú Krist í sambandi við þann atburð sem ég sá ástæðu til að gagnrýna. Ekki voru sambærilegar aðstæður þeirra og manna nú til dags. Ekki höfðu þeir aðgang að fjölmiðlum, svo sem prédikunarstólum, dagblöðum og tímaritum, útvarpi og sjónvarpi ásamt "Internetinu" með öllu því fári, sem þar er rótað upp. Var það ekki þess vegna sem þeir þurftu að prédika á götuhornum og torgum?

Ég lít á kirkjuna sem friðarins stað og þangað vil ég sækja ró og frið frá amstri dagsins. Hlýða á fallegan sálmasöng og uppbyggilega prédikun, ekki pólitík og þras. Nóg er um það í fjölmiðlunum.

Var það ekki Plótinus sem sagði að engin trúarbrögð væru sannleikanum æðri. Hafa ekki öll trúarbrögð tvær hliðar, innri og ytri leið? Og býr ekki helgin í tilfinningum fólks? Getur guðfræðingur skýrt það hvað býr þar að baki? Eða hver er veruleikinn í heimi hverfulleikans? Væri gott að fá svör við þessu.

Aldraður og vinnulúinn maður spurði Dalai Lama á almennum fundi hver væri tilgangur lífsins. Stórt var spurt. Svar hans var skýrt: "Það er að vera hamingjusamur og að gera aðra hamingjusama."

Að lokum: Presturinn ýjar að því að ég álíti að kirkjan sé baggi á þjóðfélaginu? Ég spyr nú bara, hefir það eitthvað að gera með það hvort prestar vilji vera mannasættar eða tala á æsingafundi við Alþingishús Íslendinga? En ég minntist ekki á þá þörfu stofnun í minni einföldu fyrirspurn.

Ég hefi ekki hug á að standa í þrætum svo þetta verða lokaorð mín um þetta mál.

Ásta Kristjánsdóttir

Kettlingar óska eftir heimil

4 sprækir, ljúfir og dásamlega fallegir kettlingar leita að góðum heimilum. 2 læður, ein dökk og hin þrílit. 2 högnar, annar ljós og hinn grár og hvítur. Átta vikna og allir kassavanir. Meiri upplýsingar i síma 8666981.

Svarta-Péturs er saknað

SVARTUR, fullvaxinn fress tapaðist af Digranesheiði, huganlega rétt fyrir verslunarmannahelgi. Er ekki með ól en eyrnamerktur. Upplýsingar gefur Margrét í síma 5610171 eða 8487619.

Kvenreiðhjól tapaðist

Svart gamaldags kvenreiðhjól hvarf frá húsi við Langholtsveg um verslunarmannahelgi. Hjólið er með hlífum yfir dekkjum og keðjum, á bögglaberanum töskur sem héngu niður með, grænmynstraðar. Skilvís finnandi má endilega hafa samband við Guðrúnu í síma 553 9165 eða 896 3649.