* LOGI Geirsson skoraði 9 mörk og var markahæstur í liði Þýskalandsmeistara Lemgo þegar liðið bar sigurorð af 3. deildarliðinu Burgdorf , 35:23, í æfingaleik í gær.
* LOGI Geirsson skoraði 9 mörk og var markahæstur í liði Þýskalandsmeistara Lemgo þegar liðið bar sigurorð af 3. deildarliðinu Burgdorf , 35:23, í æfingaleik í gær. Þetta var annar leikur Loga með Lemgo en hann skoraði 14 mörk í sigurleik þess gegn Katlenburg um síðustu helgi. Heiðmar Felixson skoraði 4 af mörkum Burgdorf en hann gekk á dögunum til liðs við félagið frá Bidasoa .

* ÁRNI Björn Þórarinsson, handknattleiksmaður, hefur ákveðið að leika með Víkingum næsta vetur en hann er vinstri hornamaður og lék með KA á síðustu leiktíð. Árni er 20 ára gamall og hefur verið einn af lykilmönnum KA síðustu tvö tímabil en hann er að fara í skóla í haust í Reykjavík.

*DÓMARATRÍÓIÐ

á leik Íslands og Ítalíu 18. ágúst á Laugardalsvellinum kemur frá Svíþjóð. Peter Fröjdfeldt dæmir leikinn, aðstoðardómarar hans eru Stefan Wittberg og Ingemar Larsson. Gylfi Þór Orrason verður fjórði dómari.

* MARCELLO Lippi, landsliðsþjálfari Ítalíu, velur landslið sitt fyrir leikinn gegn Íslandi fyrr en sunnudaginn 15. ágúst og kemur liðið saman í Flórens daginn eftir. Til Íslands kemur liðið á þriðjudag, leikur á miðvikudagskvöld og heldur á ný til Ítalíu að leik loknum.

*ÓLAFUR Ingi Skúlason

lék með varaliði Arsenal, sem gerði jafntefli við Beveren í Belgíu, 0:0.

*DRAUMALIÐ Bandaríkjanna í körfuknattleik sem keppir á Ólympíuleikunum í Aþenu sigraði Þýskaland í fyrrakvöld með þriggja stiga mun, 80:77. Allen Iverson tryggði bandaríska liðinu sigurinn með þriggja stiga körfu á lokaandartökum leiksins. Tim Duncan gerði 19 stig fyrir Bandaríkin en Dirk Nowitzki , leikmaður Dallas Mavericks , gerði 32 stig fyrir Þýskaland .

* MATEJA Kezman , sóknarmaður Chelsea , var í gær úrskurðaður í þriggja leikja bann af enska knattspyrnusambandinu en hann fékk að líta rauða spjaldið gegn Roma á æfingamóti Bandaríkjunum í síðustu viku. Leikbannið tekur gildi 17. ágúst og því mun hann geta tekið þátt í fyrsta leik Chelsea í ensku úrvalsdeildinni sem er gegn Manchester United 15. ágúst.

* NÝLIÐAR Norwich í ensku úrvalsdeildinni hafa keypt Svíann Mattias Jonson en hann er 30 ára sókndjarfur miðjumaður. Mattias kemur frá danska liðinu Bröndby en hann hefur leikið 41 landsleik og hann tók þátt í öllum fjórum leikjum Svía á Evrópukeppninni í Portúgal.