Matur | mbl | 29.8.2017 | 11:00

Grillaðir humarhalar með hvítlaukssósu og piparosta-ostabrauði

Grillaðir humarhalar með bestu hvítlaukssósu allra tíma og piparosta-ostabrauði. mbl.is/Ragnar Freyr

Matarbloggarinn Ragnar Freyr Ingvarsson, betur þekktur sem Læknirinn í eldhúsinu, kann svo sannarlega að gera vel við sig eins og sést hér. Hann segir þessa hvítlaukssósu vera hreinan unað!

Hvítlaukurinn eftir bakstur. mbl.is/Ragnar Freyr

„Í þessari færslu er eiginlega sósan sem leikur aðalhlutverkið. Og það er vegna þess að ég held bara að mér hafi tekist að gera bestu hvítlaukssósu sem ég hef bragðað. Og það er ekki eins og humarinn og piparosta-hvítlauksbrauðið hafi ekki verið ljúffengt – sósan var barasta algerlega dásamlega ljúffeng!

Og það tókst með því að ofnbaka hvítlaukinn í álpappír. Þannig umbreytist hann alveg – og það heita og sterka bragð sem oft einkennir hvítlauk mildast en í staðinn koma sætir tónarnir og ljúfu jafnvægi náð,“ segir Ragnar í nýrri færslu á blogginu sínu.

Grillaðir humarhalar með bestu hvítlaukssósu allra tíma og piparosta-ostabrauði

Hráefnalisti – fyrir fjóra

Fyrir sósuna

1 hvítlaukur
2 msk. jómfrúarolía
salt og pipar
1 dós sýrður rjómi
2 msk. grísk jógúrt
2 msk. mæjónes
1 tsk. hlynsíróp
3 msk. graslaukur
salt og pipar

Fyrir humarinn

Humar
hvítlauksolía
salt og pipar

Fyrir piparostsosta-hvítlauksbrauð

1 baguetta
hvítlauksolía
1 piparostur
rifinn ostur eftir smekk
salt og pipar

Byrjum á byrjuninni; hvítlaukssósan guðdómlega.

Byrjið á því að setja heilan hvítlauk á álpappír, hella olíunni yfir og salta. Innsiglið og bakið í 180 gráðu heitum ofni í 50 mínútur. Leyfið lauknum að kólna aðeins áður en þið farið að meðhöndla hann þar sem hann er ákaflega heitur.

Á meðan hvítlaukurinn er að kólna setjið þið heila dós af sýrðum rjóma í skál.

Hrærið sýrða rjómann saman við tvær matskeiðar af grískri jógúrt og svo sama magni af mæjónesi og hrærið vel saman.

Hakkið graslaukinn og blandið honum saman ásamt öllum hvítlauknum – sem auðvelt er að kreista úr hýði sínu.

Klippið humarinn upp eftir bakinu og hreinsið görnina frá og leggið humarhalann ofan á skelina. Penslið humarinn ríkulega með hvítlauksolíu, salti og pipar. Grillið í fimm til sex mínútur á blússheitu grilli eða inni í ofni.

Skerið baguettuna í tvennt, penslið með hvítlauksolíu, sneiðið piparostinn þunnt og leggið á brauðið. Setjið því næst rifinn ost ofan á og grillið í ofninum í nokkrar mínútur þangað til osturinn er bráðinn. Svo er bara að leggja þessa dásemd á disk og njóta – grillaður humar, dásamlegt piparosta-ostabrauð og nóg af þessari dásamlegu hvítlaukssósu.