Matur | Morgunblaðið | 10.6.2018 | 14:03

Sælgætis skötuselur með engifer, chili og lime

Skötuselurinn er sérlega girnilegur eins og sjá má. mbl/Arnþór Birkisson

Hugi Kristinsson, matreiðslumaður á Tryggvaskála á Selfossi galdrar hér fram fyrir lesendur dásemdar skötusel með fersku sítrussalati og meðlæti sem er hvert öðru girnilegra. Hér er hráefnið í fyrirrúmi.

Grilllögur

200 ml matarolía
100 ml soyasósa
½ chili
3 hvítlauksgeirar
3-4 cm engiferrót
safi úr 1 lime

AÐFERÐ:

Chili er kjarnhreinsað og saxað, hvítlaukur og engiferrót rifin og öllu blandað saman. Skötuselurinn er skorinn í 80-100 gr bita og látinn liggja í leginum í 30-40 mínútur.

Sítrussalat

2 lime
2 sítrónur
3 appelsínur
1 granatepli
3 vorlaukar
smá steinselja

AÐFERÐ:

Börkur af lime, sítrónu og appelsínu er tekinn af og ávextirnir skornir í lauf. Steinselja og græni parturinn af vorlauknum er söxuð. Allt sett saman í skál og djúsað með extra virgin ólífuolíu, sítrónusafa og smá salti.

Kartöflusalat

400 gr kartöflur - helst smælki
rauð paprika
½ chili
1 skallotu laukur
4-5 msk basilpestó
1-2 msk grófkorna sinnep.

AÐFERÐ:

Kartöflur eru soðnar og kældar. Paprika, chili og skallottulaukur eru söxuð niður og kartöflur skornar í fallega báta. Öllu blandað saman ásamt smá ólífuolíu og smakkað til með salti.

Hvítlaukssósa

1 hvítlaukur
1 sítróna
1 dós sýrður rjómi 24%

AÐFERÐ:

Hvítlaukur er rifinn niður og blandað saman við sýrðan rjóma, börkurinn af 1 sítrónu er rifinn með fínu rifjárni og blandað saman við. Smakkað til með sítrónusafa og salti.

Skötuselurinn er grillaður í 2-3 mínútur á hvorri hlið. Aspas er vafinn í hráskinku (passa að brjóta trénaða partinn neðan af), aspas og grænkáli er svo velt upp úr olíu og salti áður en grillað. Grænkálið er svo dressað í sítrónusafa og salti áður en borið fram.