Matur | mbl | 16.7.2018 | 11:27

Parmesan-kjúklingur sem yljar hjartanu

Þessi kjúklingur fær að krauma í rjómakenndri tómatsósu, kryddaður með óregano og borinn fram með bráðnum parmesan osti svo bragðlaukarnir taka gleði sína. mbl.is/therecipecritic

Nú þegar rigningarveður, súld og vosbúð virðist engan endi ætla að taka er eina ráðið að hafa það náðugt í eldhúsinu og elda eitthvað huggunarfæði sem yljar okkur að innan. Þessi kjúklingur fær að krauma í rjómakenndri tómatsósu, kryddaður með óregano og borinn fram með bráðnum parmesan osti svo bragðlaukarnir taka gleði sína og við getum gleymt þessu veðri um stund.

Parmesan-kjúklingur sem yljar hjartanu

2 msk. ólífuolía
4 kjúklingabringur
1 lítill laukur
2 hvítlauksgeirar
1 dós af niðursoðnum tómötum í sósu
½ bolli rjómi
¼ bolli rifinn parmesan ostur
1 tsk. óregano
salt og pipar
½ bolli parmesan ostur

Aðferð

Takið fram stóra pönnu og bætið við einni matskeið af ólífuolíu. Kryddið kjúklingabringurnar með salti og pipar. Steikið kjúklinginn á meðalháum hita í 4-5 mínútur á hvorri hlið, eða þar til hann brúnast vel og er eldaður í gegn.
Takið kjúklinginn af pönnunni og færið yfir á disk. Bætið við matskeið af ólífuolíu á pönnuna. Saxið laukinn og hvítlaukinn smátt og steikið á pönnunni þar til hann er orðinn mjúkur. Bætið þá við niðursoðnu tómötunum í sósu á pönnuna. Gott er að merja tómatana með sleif ef þeir eru stórir. Bætið við rjóma, 1/4 bolla af rifnum parmesan osti og óregano kryddi. Bætið því næst við salti og pipar eftir smekk.
Náið upp suðu og setjið þá kjúklinginn aftur á pönnuna útí sósuna og leyfið honum að hitna vel. Rífið vel yfir af parmesan osti eða um 1/2 bolla, og berið fram með pasta, eða einan og sér.