Matur | Hraðréttir | mbl | 4.10.2018 | 14:06

Ómótstæðileg haustsúpa með kjúklingi

Ef það er eitthvað sem getur ekki klikkað er það þessi súpa. Hér erum við að tala um hina fullkomnu haustsúpu sem er í senn ótrúlega bragðgóð, afar seðjandi, bráðholl auk þess sem hún flytur okkur um stund á fjarlægar slóðir.

Taílensk núðlusúpa með kjúklingi og sætum kartöflum

1 dós kókosmjólk
1/4 bolli rautt karrýmauk
4 bollar vatn
2 kjúklingateningar
450 g kjúklingabringur frá Ali, skornar í bita
1 bolli sæt kartafla, afhýdd og skorin í teninga
1/3 bolli hnetusmjör
1 msk. tamarind-sósa
2 msk. fiskisósa
2 msk. púðursykur
1/2 tsk. túrmerik
1 rauð paprika
160 g núðlur
2 bollar baunaspírur
1/4 bolli ferskt kóriander
1/4 bolli salthnetur
vorlaukur, sneiddur

Aðferð:

Hitið þykka hlutann sem er efst í kókosmjólkurdósinni í rúmgóðum potti, yfir miðlungsháum hita.
Bætið karrýmaukinu saman við og látið sjóða saman í um mínútu.
Bætið því sem eftir er í kókosmjólkurdósinni í pottinn ásamt vatni, kjúklingateningum, kjúklingi, sætum kartöfluteningum, hnetusmjöri, tamarind-sósu, fiskisósu, púðursykri og túrmeriki.
Látið suðuna koma upp og sjóðið við vægan hita í 10 mínútur.
Bætið papriku og núðlum í pottinn og sjóðið áfram í 5 mínútur.
Bætið baunaspírum í pottinn og takið af hitanum.
Berið núðlusúpuna fram með kóriander, hökkuðum salthnetum og vorlauki.