Matur | mbl | 4.11.2018 | 10:59 | Uppfært 15:58

Samlokan sem mun kollvarpa heimsmynd þinni

mbl.is/Huffinton Post

Hér gefur að líta mögulega þá girnilegustu samloku sem sést hefur enda samanstendur hún af súrdeigsbrauði, brie-osti, beikoni og fíkjusultu.

Samlokan fær hörðustu samlokuandstæðinga til að skipta snarlega um skoðun (já, til er það fólk sem telur að samlokur séu óæðri matur) enda er þetta sannkölluð gourmet-sprengja svo ekki sé fastar að orði kveðið.

Grilluð samloka með brie, beikoni og sultu

4 msk. smjör við stofuhita
4 sneiðar af súrdeigsbrauði
6 vænar sneiðar af beikoni
1 laukur, skorinn í tvennt og svo í þunnar sneiðar
1 msk. balsamik-edik
2 msk. fíkjusulta
120 g brie ostur í sneiðum

Aðferð:

Steikið beikonið uns stökkt og stórglæsilegt. Leggið til hliðar. Steikið laukinn á pönnunni (notið fituna af beikoninu) uns hann er farinn að brúnast í rólegheitunum. Bætið balsamik-ediki á pönnuna og eldið í eina mínútu til viðbótar.
Setjið smjörið ríflega öðru megin á hverja brauðsneið. Smyrjið sultunni á hina hliðina. Setjið síðan karmeliseraða laukinn ofan á sultuhliðina, svo beikon og loks brie ostinn. Setjið aðra brauðsneið ofan á og látið smjörhliðina snúa upp.
Setjið samlokuna á pönnu og steikið í 3-4 mínútur á hvorri hlið eða þar til osturinn er farinn að leka ómótstæðilega út og brauðið sjálft er orðið stökkt.