Matur | mbl | 23.12.2018 | 19:03 | Uppfært 23:11

Humarforrétturinn úr Íslandsbankadagatalinu

mbl.is/Berglind Hreiðarsdóttir

Góðar uppskriftir leynast víða og þessi á sér ansi merkilega sögu því eftir bestu heimildum birtist hún í dagatali Íslandsbanka fyrir mörgum árum og á líklega ættir að rekja langt aftur ef að líkum lætur.

Það er Berglind Hreiðars á Gotterí sem á heiðurinn af útfærslunni sem birtist hér sem hún segist hafa smakkað fyrst hjá Henný vinkonu sinni. Henný hafi svo sent henni uppskriftina og þá hafi uppruni hennar komið í ljós. Hver á svo upphaflega heiðurinn af uppskriftinni er ekki vitað en þið megið endilega hafa samband við okkur ef þið liggið á þeim upplýsingum.

Haft var samband við mbl.is og þeim upplýsingum komið á framfæri að höfundur uppskriftarinnar sé engin önnur en Valgerður Sigurðardóttir borgarfulltrúi sem var á þeim tíma starfsmaður Íslandsbanka og sendi uppskriftina inn í keppni.

Humarvindlar uppskrift

1 stórt hvítt samlokubrauð
1 askja skelflettur humar (um 300-400 g)
180 g smjör
2 x hvítlauksrif (pressuð)
1 msk. söxuð fersk steinselja
Salt, sítrónupipar og hvítlauksduft eftir smekk
Finnsson hvítlaukssósa.

Aðferð

Skerið kantana af brauðsneiðunum og fletjið út á báðum hliðum svo það verði þunnt og þétt í sér.
Bræðið smjörið og hrærið pressaðan hvítlaukinn, steinseljuna og smá hvítlauksduft saman við.
Raðið humri á brauðið, um 2 bitar duga fyrir hvert brauð en að sjálfsögðu má setja meiri humar í hvern bita svo þetta er smekksatriði (ég var með 350 g af humri, setti 2 bita á hverja sneið og úr urðu 18 stykki).
Kryddið humarinn með sítrónupipar og salti.
Rúllið brauðinu þétt utan um humarinn og leggið hann til hliðar með samskeytin niður.
Hellið smjörblöndunni á disk með uppháum köntum og veltið hverjum bita létt upp úr blöndunni (varist að bleyta bitana of mikið en þó þannig að þeir þekist alveg.
Raðið bitunum á ofnskúffu íklædda bökunarpappír og bakið í um 12-15 mínútur við 200°C eða þar til þeir gyllast og verða stökkir að utan.
Best að taka bitana strax af smjörpappírnum og raða á pappír til að koma í veg fyrir þeir liggi og linist upp í smjörinu sem eftir situr.
Berið fram með E. Finnsson hvítlaukssósu og salati.