Matur | mbl | 23.2.2019 | 11:06 | Uppfært 14:26

Ómótstæðileg og auðveld eplaskúffukaka

mbl.is/Eldhúsperlur

Eplakökur eru kökur sem klikka aldrei enda eru þær algjörlega æðislegar. Þessi uppskrift er innblásin af uppskrift frá Mary Berry, dómara í British Bakeoff en það er Helena á Eldhúsperlum sem sá um baksturinn og endanlega útfærslu.

Ómótstæðileg og auðveld eplaskúffukaka

Eplaskúffukaka

400 gr. græn epli, skræld og skorin í þunnar sneiðar (ég notaði tvö stór epli)
Safi úr hálfri sítrónu
2 msk. kanilsykur
250 gr. mjúkt smjör
200 gr. ljós púðursykur (eða hvítur sykur og dökkur púðursykur til helminga)
4 egg
250 gr. hveiti
2 tsk. lyftiduft
1 tsk. matarsódi
1/2 tsk. salt
1 tsk. kanill
1 dl mjólk

Aðferð:

Hitið ofn í 170 gráður með blæstri.
Setjið eplasneiðarnar í skál, kreistið sítrónusafa yfir þær og stráið einni matskeið af kanilsykri yfir. Setjið til hliðar.
Þeytið saman smjör og sykur þar til ljóst og létt og bætið eggjunum einu í einu út í og þeytið vel á milli.
Pískið saman hveiti, lyftiduft, matarsóda, salt og kanil og bætið út í smjörblönduna ásamt mjólkinni.
Hrærið vel saman en gætið þess að hræra ekki of lengi.
Smyrjið skúffukökuform að innan eða þekið með smjörpappír.
Setjið helminginn af deiginu í botninn og dreifið vel úr því, raðið helmingnum af eplasneiðunum yfir.
Setjið svo restina af deiginu yfir eplin og dreifið vel úr.
Raðið að lokum eplum yfir og stráið 1 msk. af kanilsykri yfir allt. Bakið í 30-40 mínútur eða þar til prjónn sem stungið er í miðja kökuna kemur hreinn upp og eplin eru orðin mjúk.
Sigtið dálítinn flórsykur yfir kökuna þegar hún hefur kólnað aðeins, berið fram volga með þeyttum rjóma.