Matur | mbl | 25.8.2019 | 16:46

Uppskrift að dásemdar flatbrauði

Það er lítið mál að baka sjálfur flatbrauð sem eru frábært meðlæti eða léttur réttur. mbl.is/frederikkewærens.dk

Flatbrauð eru auðveld í framkvæmd og henta bæði sem meðlæti eða sem léttur og þá jafnvel með parmaskinku, nýrifnum parmesan og góðu pestói. Þessi flatbrauð eru hnoðuð í hrærivél en það má alveg hnoða sjálfur á borði. Flatbrauðin haldast safarík og góð ef þú pakkar þeim inn í viskastykki.

Svona bakar þú dásemdar flatbrauð (10 stk)

15 g ger
2,5 dl vatn
1 msk. jógúrt eða sýrður rjómi
½ tsk salt
1 tsk. sykur
450 g hveiti

Aðferð:

Leysið gerið upp í vatni. Bætið jógúrtinni saman við og hrærið í. Bætið salti og sykri út í og bætið hveitinu saman við smátt og smátt. Hnoðið þar til deigið losnar frá skálinni. Látið hefast í skálinni í 1 tíma undir viskastykki.
Skiptið deiginu upp í 10 jafn stóra hluta. Rúllið hverri bolli flatt út á hveitilagt borð.
Hitið pönnu á háan hita. Steikið flatbrauðin, eitt í einu, í sirka 1 mínútu á hvorri hlið. Fylgist vel með brauðinu á pönnunni þar sem það getur auðveldlega brunnið.
Pakkið brauðinu inn í viskastykki til að þau haldist betur.