Matur | mbl | 17.9.2019 | 13:49

Súpan sem bjargar okkur í haustlægðinni

Góð súpa er allt sem þarf á haustdögum sem þessum. mbl.is/Anders Schønnemann

Það fer ekkert á milli mála að við erum dottin inn í árstíðarskipti. Þá færum við okkur frá útigrillinu og yfir í pottana í eldhúsinu. Súpur eru það allra besta þegar haustlægðin liggur yfir landinu – ein sem yljar manni um kroppinn á meðan við heyrum í rigningunni berja á gluggana. Þessi súpa er með núðlum og portobello-sveppum en það má vel bæta kjúklingi saman við til að hún verði matarmeiri.

Súpan sem bjargar okkur í haustlægðinni

Súpan sem bjargar okkur í haustlægðinni (fyrir 2)

1 msk. engifer, smátt saxað
2 stór hvítlauksrif, marin
2 tsk. sítrónugras, smátt saxað
1 msk. rautt karrí (eða eftir smekk)
ólífuolía
8-10 dl grænmetiskraftur eða vatn
2 msk. fiskisósa
safi úr ½ lime
2 tsk. sykur

Fylling:

3 portobello-sveppir í skífum
100 g grænar baunir
ólífuolía
salt
núðlur
½ búnt vorlaukur
handfylli fersk mynta

Aðferð:

Steikið engifer, hvítlauk, sítrónugras og rautt karrí upp úr smávegis af olíu í potti, samt ekki þannig að hráefnin taki lit. Setjið kraftinn eða vatnið út í og látið suðuna koma upp. Smakkið til með fiskisósu, lime og sykri – látið malla í 5-10 mínútur.
Steikið sveppina upp úr olíu á heitri pönnu. Gufusjóðið baunirnar í nokkrar mínútur upp úr saltvatni.
Sjóðið núðlurnar og setjið í tvær stórar skálar ásamt sveppum, baunum, vorlauk og myntu. Hellið heitri súpunni yfir og berið strax fram.