Matur | mbl | 11.5.2020 | 15:38

Bragðmikið bolognese með pestó

Afar ljúffeng uppskrift að ekta bolognese. mbl.is/Snorri Guðmundsson

Hann Snorri hjá Matur og myndir, veit alveg hvað hann er að gera í eldhúsinu. Hér gefur hann okkur uppskrift að bragðmiklu bolognese sem er með því ljúffengara miðað við önnur sambærileg.

Snorri mælir með að nota Roasted pepper pesto´ið frá Sacla og Mezzi Paccheri pasta (stórir hringir, fæst í Hagkaup).

Bragðmikið bolognese með pestó (fyrir 4)

500 g nautahakk
1 laukur, saxaður
1 hvítlauksrif, saxað
1 teningur, grísakraftur
1 lítil krukka rautt pesto (t.d. Sacla – Roasted pepper)
2 msk. tómatpúrra
50 g rifinn ostur
15 g parmesan-ostur
1-2 ml chili flögur
Basilika
250 g gott pasta (t.d. mezzi paccheri)

Aðferð:

Sjóðið pasta eftir leiðbeiningum en geymið um 150 ml af pastavatni áður en því er hellt frá.
Hitið 1 msk. olíu á pönnu við miðlungshita og steikið laukinn þar til glær og mjúkur.
Hækkið hitann ögn og bætið hakki út á pönnuna. Steikið hakkið þar til brúnt og bætið þá hvítlauk út á og steikið í 1-2 mín. til viðbótar.
Bætið krafti, tómatpúrru, chili-flögum og krukku af rauðu pestó út á pönnuna og lækkið hitann ögn. Látið malla undir loki í 15 mín.
Bætið við pastavatni, 1 msk. í einu, út í kjötsósuna og hrærið vel þar til kjötsósan er orðin nægilega blaut og búin að þykkjast svolítið (ath. við viljum ekki hafa fljótandi sósu). Sirka 100-150 ml.
Rífið parmesan og hrærið saman við kjötsósuna ásamt mozzarella-osti. Saxið basil og stráið yfir.
Berið fram með hvítlauksbrauði og/eða fersku salati.