Læknirinn stal uppskrift frá Fjallkonunni
Setja bókamerki
Réttilega ætti orðið að stela í fyrirsögninni að vera í gæsalöppum enda hér á ferðinni æðsta viðurkenning sem veitingastaður getur fengið. Sjálfur Læknirinn í eldhúsinu var svo heillaður af lamba-chermoula-réttinum sem hann pantaði á Fjallkonunni að hann lagðist yfir bækur til að gera sína eigin uppskrift sem líktist sem mest réttinum á Fjallkonunni.
Sjálfur grínast Ragnar með að þetta sé snarstolin uppskrift en hvaða uppskrift er það ekki!
„Fyrir tveimur vikum skrapp ég í hádegisverð á Fjallkonuna niðri í miðbæ. Átti góðan fund með tveimur kollegum þar sem við fórum yfir verkefni komandi missera. Pantaði rétt, lamba-chermoula, með öllu tilheyrandi og varð alveg orðlaus. Hann var algert sælgæti. Svo góður, að ég setti um leið mynd upp í samfélagsmiðlaskýið, mér til áminningar að reyna við mína eigin útgáfu síðar. Og liðna helgi gerði ég mína eigin uppskrift.
Matseðillinn á Fjallkonunni var auðvitað til hliðsjónar en auðvitað þurfti ég að skoða ólíkar uppskriftir af chermoula, sem er kryddmauk eða marínering frá Norður-Afríku og kemur víða fyrir í uppskriftum frá Túnis, Alsír, Marokkó og Líbíu. Mín uppskrift er samsuða úr nokkrum ólíkum áttum.
Þessi uppskrift inniheldur þó nokkurn fjölda hráefna – sem eru elduð hvert í sínu lagi – og engin þeirra eru sérstaklega flókin. Þetta var góður sunnudagur í eldhúsinu.“
Læknirinn stal uppskrift frá Fjallkonunni
Stolið sælgæti – Lamba-chermoula með poppuðum kjúklingabaunum, grilluðum kúrbít, furuhnetum, granatepli og hvítlaukskremi
Fyrir sex
- 1200 g lambamjaðmasteik (efri parturinn af lambalærinu – eins mætti úrbeina lambalæri)
- 1 poki regnbogagulrætur
- 5 msk jómfrúarolía
- 1/2 krukka marokkósk harissa frá Kryddhúsinu
- 1 tsk. ras el hanout frá Kryddhúsinu
- 1 tsk. papríkuduft
- 2 msk. hunang
- 1 msk. srirachasósa
- 1/2 chiliduft
- safi úr límónu
- salt og pipar
Hitaði olíu í pönnu og brúnaði kjötið að utan. Lét það síðan í eldfast mót ásamt flysjuðum regnbogagulrótum og setti í 150 gráða forhitaðan ofn. Stakk hitamæli í kjötið og lét það fara í 54-56 gráður í kjarnhita.
Hvítlaukskrem
- 150 ml feitur sýrður rjómi
- 50 ml nýmjólk
- 3 hvítlauksrif
- 1 tsk hunang
- safi úr hálfri límónu
- salt og pipar
Aðferð:
- Hvítlaukskremið er svo einfalt að það hálfa væri nóg. Galdurinn er að nota feitan sýrðan rjóma, setja í skál, blanda maukuðum hvítlauknum saman við, sem og hunangi, límónusafa og mjólkurskvettu. Smakka til með salti og pipar. Láta standa í kæli.
Chermoula-kryddmauk
- 200 ml jómfrúarolía
- 1 búnt steinselja
- 1 búnt kóríander
- 1 msk. broddkúmen (kummín)
- 1 msk. kóríander
- 1 msk. paprikuduft
- 1 stór skalottlaukur
- 4 hvítlauksrif
- 4 msk. rúsínur
- safi úr límónu
- salt og pipar
Aðferð:
- Chermoula er kryddmauk sem er fljótlegt að útbúa. Byrjaði á því að þurrrista kryddin á pönnu og færa svo yfir í matvinnsluvél. Þá bætti ég við skalottulauknum, hvítlauknum, fersku kryddunum, safa úr límónu, rúsínum, og svo jómfrúarolíu. Saltið og piprið eftir smekk.
- Meðlætið var ekki sérlega flókið. Kúrbíturinn var skorinn í hæfilegar sneiðar, velt upp úr hvítlauksolíu, saltaður og pipraður og svo eldaður á grillinu.
- Kjúklingabaunirnar voru skolaðar og látnar standa til að þorna. Steiktar upp úr heitri olíu og svo velt upp úr broddkúmeni, sítrónusafa og salti og pipar.
- Furuhneturnar voru þurrsteiktar á pönnu og lagðar til hliðar.
- Granateplið er skorið í helminga og rauðu perlurnar sóttar með því að lemja á ávöxtinn með skeið.
- Bulgurið er soðið í kjúklingasoði, skv. leiðbeiningum á umbúðunum.
- Með matnum nutum við Masi Campofiorin frá 2017. Þetta vín er ósjaldan á borðum hjá okkur enda finnst mér það ljúffengt. Svo finnst mér ég einhvern veginn tengdur þessum framleiðenda þar sem ég heimsótti vínekruna í tengslum við sjónvarpsþættina mína – Ferðalag bragðlaukanna.
- Svo er bara að hlaða á diskinn: Fyrst bulgur, svo niðursneitt lambakjöt, kúrbítur og gulrætur, skreytt með chermoula og hvítlaukskremi. Furuhnetum, kjúklingabaunum og granatepli sáldrað yfir.
- Þetta er svona máltíð þar sem hver munnbiti kemur á óvart. Endilega prófið þessa uppskrift – algert sælgæti!
Inga Sæland mátti vita betur
Má ekki vera geðþóttaákvörðun sveitarfélaga
Borgin stendur við viðburðargjald
Nýtt hitamet í maímánuði
Logi misskildi spurningu Ingibjargar
Skatttekjurnar þrír eða fimm milljarðar
Bænum gert að farga húsinu á kostnað eiganda