Þú kannast eflaust við að komast ekki á alla litlu staðina með ryksugunni þar sem stúturinn er svo sver og meira segja aukahlutirnir sem fylgja með duga ekki til. Þá þarftu að vita þetta hér.

Það er alveg sama hversu margir aukahlutir fylgja með ryksugunni þinni, það eru alltaf staðir sem þú nærð ekki til með neinum þeirra. Til dæmis niður í grindina á ofninum, undir þvottavélina eða í rifurnar á glugganum – allt staðir sem engar græjur ná niður til. En þá birtist okkur þetta húsráð sem við verðum að deila með ykkur því fólk gapir hreinlega yfir þessari miklu snilld.

Eina sem til þarf er pakki af rörum (núna er góður tími til að endurnýta gömlu plaströrin). Settu teygju utan um rörin til að krafturinn í ryksugunni komi ekki til með að soga þau öll til sín. Taktu munnstykkið af ryksugunni og stingdu rörunum upp hjá stútnum. Passið að rörin séu nægilega mörg til að passa vel inn í rörið. Núna ertu fær um að þrífa alla þá staði sem þú hefur ekki náð til árum saman. Og það væri gaman að sjá ryksuguframleiðendur koma með sambærilega nýjung á markað til að létta okkur lífið.