Matur | mbl | 26.10.2023 | 18:00 | Uppfært 30.10.2023 12:21

Krúttlegir marensdraugar í hrekkjavökupartíið

Krúttlegir marensdraugar sem eru fullkomnir í hrekkjavökupartíið. Samsett mynd

Þessir litlu krúttlegu marensdraugar er fullkomnir fyrir Hrekkjavökuna sem er fram undan þriðjudaginn 31. október næstkomandi. Það má alveg taka forskot á sæluna og byrja að prófa sig áfram með alls konar hrekkjavökukræsingar. Að baka þessa marensdrauga og mála er líka skemmtilegt samvinnuverkefni fyrir fjölskylduna í eldhúsinu um helgina. Heiðurinn af þessari uppskrift á Sylvía Haukdal ástríðubakari hjá 17 Sortum og hún sýnir galdurinn við baksturinn og skreytingarnar á Instagram-síðu sinni.

Krúttlegir marensdraugar

400 g sykur
200 g eggjahvítur
Saltstangir
Matarlitur

Aðferð:

Setjið sykurinn á bökunarpappír og hitið við 190°C hita í 7-9 mínútur.
Þeytið eggjahvítur og hellið heitum sykrinum saman við, smá í einu.
Þegar sykurinn hefur leysts upp og blandan er orðin stíf sprautið þá drauga eða aðrar furðuverur á bökunarpappír eða sílikonmottu.
Bakið við 100°C hita í 1 klukkustund og 20 mínútur.
Látið kólna.
Málið síðan með svörtum matarlit augu og munn á marensdraugana, líkt og sýnt er í myndbandinu.