Matur | Morgunblaðið | 27.10.2023 | 6:00

Hrollvekjandi hrekkjavökukræsingar

Þórunn Högnadóttir stílisti útbjó sitt fyrsta hrekkjavökuhlaðborð á dögunum með stórkostlegri útkomu. Hrollvekjandi kræsingar prýða veisluborðið þar sem óvættir og skrímsli eru í allskonar formum. mbl.is/Eggert Jóhannesson

Hrekkjavakan ógurlegan nálgast óðfluga og margir aðdáendur hrekkjavökunnar eru farnir að undirbúa sig fyrir hryllinginn. Nýir þátttakendur bætast við hópinn árlega og það má með sanni segja að hópur þeirra sem halda upp á hrekkjavökuna hér á landi fari stækkandi.

Þórunn Högnadóttir, stílisti og fagurkeri, er ein þeirra sem eru að fara að halda upp á hrekkjavökuna í fyrsta skipti. Þórunn er fræg fyrir að fara alla leið þegar um veisluhöld er að ræða og hrekkjavakan er þar engin undantekning. Hún tók forskot á sæluna og útbjó hrollvekjandi hrekkjavökuhlaðborð þar sem hún tók þemað alla leið.

Hrekkjavökuhlaðborðið er draugalegt og kræsingarnar tryllingslegar. mbl.is/Eggert Jóhannesson

Í fyrsta skipti sem ég skreyti fyrir hrekkjavökuna

„Mér fannst þetta einstaklega gaman og í fyrsta skipti sem ég skreyti og geri smárétti fyrir hrekkjavökuna. Við fjölskyldan ætlum að fara alla leið og halda hrekkjavökupartí á laugardaginn næstkomandi og allir verða í búningum,“ segir Þórunn og er orðin spennt fyrir hrekkjavökuboðinu ógurlega.

Hrekkjavökuhlaðborðið hennar er hlaðið tryllingslegum kræsingum þar sem óvættir og skrímsli eru í alls konar formum. Á borðinu má finna fullt af skemmtilegum og frumlegum hugmyndum að kræsingum sem eiga vel heima í hrekkjavökupartíinu og auðvelt er fyrir alla að útbúa. Svarti liturinn, kóngulóarvefir og hauskúpur eru í forgrunni og drungalegt yfirbragð yfir öllu. Blöðrufígúrurnar eru ógurlegar í bland við gyllta litinn sem fær að brjótast aðeins í gegn við hrekkjavökuhlaðborðið.

Hráskinkuaugun er ógnvænleg. mbl.is/Eggert Jóhannesson

Hverjum langar ekki að borða múmíu í kökupinna formi? Sætir og litríkir innan um hryllinginn. mbl.is/Eggert Jóhannesson

Ógurlega girnileg bollakaka fyrir hryllingsaðdáendur. mbl.is/Eggert Jóhannesson

Graskerspitsurnar eru geggjaðar, frumleg og skemmtileg hugmynd að kræsingum sem steinliggja. mbl.is/Eggert Jóhannesson

Tryllingslega góðar og gefa hrekkjavökugleðinni lit. mbl.is/Eggert Jóhannesson

Súkkulaðihauskúpukakan hennar Þórunnar er ótrúleg girnileg þrátt fyrir að vera ógnvænleg. Kremið lokkar augun. mbl.is/Eggert Jóhannesson

Ostasamlokur í líkkistuformi virka frekar kuldalegar en bragðast ómótstæðilega vel í þessu nýja formi. mbl.is/Eggert Jóhannesson

Hráskinkuaugu

2 bréf hráskinka
1 box mozzarellakúlur

Aðferð:

Vefjið hráskinku utan um mozzarellakúluna, notið svartan matarlit og gerið augastein.
Notið tómatsósu til að gera æðar og notið tannstöngul til verksins.

Múmíukökupinnar

1 pk. BC-kökumix, notið sömu aðferð og við kökuna
1 box BC-súkkulaðikrem
1 túpa hvítur glassúr

Aðferð:

Myljið saman kökuna ásamt helmingnum af kreminu.
Búið til litlar kúlur.
Bræðið hvítt súkkulaði, stingið röri í súkkulaðið og í kúluna og kælið. Hyljið kúlurnar með súkkulaðinu og kælið. S
Setjið síðan glassúrinn yfir og notið svartan matarlit til að gera augu.

Hrekkjavökubollakökur

1 pk. Betty Crocker mix
250 g smjör, brætt
250 ml mjólk
2 tsk. vanilludropar
½ dl kakóduft Konsum frá Nóa og Sírusi
3 stk. egg
Smá salt

Aðferð:

Byrjið á því að hita ofninn í 180°C hita.
Notið sömu aðferð og við köku að ofanverðu nema setjið deigið í bollakökuform.
Bakið í skemmri tíma eða um 15 mínútur og notið sama smjörkrem og skreytið að vild.

Graskerspitsur

1 pk. pitsudeig að eigin vali
1 dós pitsasósa að eigin vali
1 box mozzarellakúlur
1 box pepperóní
Snæri
Kokteilpinnar

Aðferð:

Byrjið á því að hita ofninn í 175°C hita.
Fletjið út pitsadeigið, skiptið deiginu niður í 6 búta.
Setjið pitsasósu, pepperóní, mozzzarellakúlu og lokið síðan.
Bindið síðan saman og mótið grasker.
Bakið í 15-20 mínútur við 175°C hita.
Smyrjið með pískuðu eggi þegar graskerspitsurnar koma tilbúnar úr ofninum og fjarlægið snærið.

Múmíu-beikonpylsur með tómatsósu

1 pk. beikonpylsur
1 pk. pitsadeig að eigin vali

Aðferð:

Byrjið á því að hita ofninn í 175°C hita.
Fletjið deigið út og skerið í litlar ræmur, vefjið utan um pylsurnar.
Smyrjið með eggi, setjið inn í ofn og bakið í 15-20 mínútur við 175°C hita.

Hauskúpusúkkulaðikaka með kaffismjörkremi

1 pk. Betty Crocker mix
250 g smjör, brætt
250 ml mjólk
2 tsk. vanilludropar
½ dl kakóduft Konsum frá Nói og Sírus
3 stk. egg
Smá salt

Aðferð:

Byrjið á því að hita ofninn í 180°C hita.
Setjið allt hráefnið í hrærivél.
Setjið síðan kökudeigið í 20 cm springform og bakið við 180°C í 45 mínútur.
Kælið áður en kreminu er smurt yfir kökuna.

Kaffismjörkrem

250 g smjör, við stofuhita, skorið í litla kubba
250 g smjörlíki, við stofuhita, skorið í litla kubba
2 tsk. vanilludropar
1 pk. flórsykur
Smá salt
1 espresso-kaffi, kalt
1 túpa Starter-kökulitur

Aðferð:

Þeytið smjör og smjörlíki vel saman þangað til blandan er orðin létt og ljós.
Bætið við kaffi, vanilludropum ásamt salti og bætið loks við flórsykri.
Skreytið kökuna að lokum með hvítum hauskúpum (úr plasti) og súkkulaðihauskúpum.

Ostalíkkistusamlokur

1 stk. stórt samlokubrauð, skorið út eins líkkistur, sjá mynd
1 pk. rifinn ostur
4 stk. pepperóní, notað til skera út krossa
Ólífuolía eða smjör til steikingar

Aðferð:

Setjið samlokurnar saman eins og venjulegar samlokur og steikið á meðalheitri pönnu þar til tilbúið og osturinn verður bráðinn.

Súkkulaði- og lakkrískústar

6 stk. brauðstangir, t.d. Grisini
100 g suðusúkkulaði brætt
1 poki lakkrísreimar

Aðferð:

Berið brætt súkkulaði á brauðstangirnar.
Klippið lakkrísreimarnar niður og raðið neðst á brauðstangirnar.

Skrautið á hlaðborðinu fékk Þórunn á eftirfarandi stöðum:

Blöðruboginn frá www.tilefni.is Rakel og Hanna
Blöðrukóngulær Blaðrarinn/Daniel
Hauskúpur á borði fást í versluninni A4
Diskar, leðurblökublaðra, pappaleðurblökur á kertastjökum eru frá Confettisisters.