Matur | mbl | 10.11.2023 | 14:00

Humar- og chorizopitsa sem rífur í

Ómótstæðilega girnileg pitsa sem rífur í og gleður alla matgæðinga. Ljósmynd/Snorri Guðmundsson

Það er föstudagur og þá er pitsakvöld á mörgum heimilum. Ef þú ert í stuði fyrir örlítið öðruvísi pitsu þá er þessi hér, sem kemur úr smiðju Snorra Guðmundsson matgæðings, klárlega málið.

Humarinn og reykt chorizo-bragðið parast svakalega vel á móti sætunni í ananasnum, passið bara að velja góðan ananas, og hitanum frá sterka majónesinu og chiliflögunum.

Þessi rífur svo sannarlega í og pitsakvöldið verður alveg frábært. Hægt er að fylgjast með því sem Snorri er að elda á heimasíðu hans Matur og myndir.

Humar- og chorizopitsa sem rífur í

Sterk humar- og chorizopitsa

1 pitsabotn að eigin vali (400 g) eða uppáhalds pitsadeigs-uppskriftin hans Snorra hér
100 g skelflettur humar
60 sterkt chorizo
150 g mozzarellaostur
1 hvítlauksrif
150 ml pitsasósa að eigin vali, Snorra finnst Mutti best
6 g basilíka eða meira, fer eftir smekk
50 g ananasbitar ef vill
50 g japanskt majónes
10 ml srirachasósa
5 ml chiliflögur
Smjör eftir smekk
Salt eftir smekk

Aðferð:

Takið pitsabotninn úr kæli að minnsta kosti 1 klukkustund áður en elda á pitsuna.
Setjið pitsastein í neðstu grind í ofni og stillið á hæsta hita, 300°C helst.
Látið steininn hitna á meðan unnið er í öðru.
Hrærið srirachasósu saman við japanskt majónes.
Þerrið humarinn og hreinsið dökku röndina sem liggur endilangt yfir humarinn úr ef þarf.
Hitið smá olíu á pönnu við háan hita.
Bætið humarhölum út á pönnuna, pressið hvítlauk og setjið á pönnuna ásamt smjörklípu. Steikið humarinn í um 2 mínútur eða þar til hann er fulleldaður.
Saltið smá ef vill.
Notið hendurnar til þess að fletja pitsabotninn út í um 15“ hring og leggið svo á bökunarpappír.
Best er að vinna út frá miðju deigsins í átt að kantinum og reyna að hlífa um 1,5 cm af kantinum við sem mestu hnjaski, en þannig er gasinu ýtt út í kantinn sem verður til þess að hann lyftist mun betur.
Skerið chorizo í fernt.
Smyrjið pitsasósu yfir botninn og dreifið mozzarellaosti svo yfir.
Raðið humri, chorizo, ananas og chiliflögum á pitsuna.
Færið pitsuna á pitsasteininn og bakið þar til pitsan er fallega gyllt og ljúffeng.
Saxið basilíku og stráið yfir pitsuna ásamt sterku majónesi þegar hún kemur úr ofninum.
Njótið við kertaljós og huggulegheit.