Graflax með spínatrönd í anda sjöunda áratugarins

Graflax

• 8 punda lax, flakaður, þveg­inn og þurrkaður
• 6 msk. krydd­blanda, sjá upp­skrift fyr­ir neðan

Aðferð:

1. Byrjið á því að flaka lax­inn, þvoið hann og þurrkið.
2. Leggið flök­in á bakka, roðin niður.
3. Stráið krydd­inu yfir flök­in, u.þ.b. 3 mat­skeiðar á hvort flak.
4. Leggið annað flakið ofan á hitt og látið sár­in snúa sam­an.
5. Látið lax­inn liggja í kæli í 14-15 klukku­stund­ir og snúið hon­um einu sinni.

Krydd­blanda á lax­inn

• 3 msk. gróft salt
• ½ tsk. lauk­duft
• ½ tsk. pip­ar
• 1 tsk. fenn­el
• (1 ½ msk syk­ur/​púður­syk­ur)
• 2 búnt dill (ferskt) eða 3-4 msk. duft
• 1 tsk. salt­pét­ur (má sleppa)

Aðferð:

1. Setjið allt hrá­efnið sam­an í skál og hrærið vel sam­an.

Sinn­epssósa með graflaxi

• 1 dós sýrður rjómi (eða 250 g maj­ónes)
• 1 msk. sætt sinn­ep
• 1 msk. dijon sinn­ep
• 1-2 msk. hun­ang
• 1 msk. dill
• 1 tsk. púður­syk­ur
• Salt og pip­ar eft­ir smekk

Aðferð:

1. Öllu hrært sam­an í skál og bragðbætt eft­ir smekk.

Spínatrönd

• 2 pk. frosið spínat (eða 800 g nýtt)
• 5 dl vatn
• 5 dl rjómi
• 2 pk. fiski­hlaup (Toro)
• 1 ten­ing­ur kjúk­lingakraft­ur

Aðferð:

1. Sjóðið spínatið í litlu vatni sam­kvæmt leiðbein­ing­um á pakka.
2. Hellið á sigti, skolið úr köldu vatni og kreistið allt vatn úr því.
3. Saxið spínatið.
4. Hitið vatn og rjóma og leysið hlaup­duftið upp í því ásamt ten­ingn­um, blandið spínatinu út í og smakkið til með hvít­um pip­ar.
5. Setjið í mót og kælið.
6. Berið síðan dýrðina fram með ristuðu brauði, smjöri, spínatrönd og sinn­epssósu eða graflaxsósu.