Matur | mbl | 29.4.2024 | 11:00

Theodór matreiðslumeistari býður upp á steiktan fisk

Theódór Haraldsson matreiðslumeistar hjá ÚA býður upp á steiktan fisk sem borinn er fram með heimagerðu remúlaði, soðnum kartöflum og brúnuðum lauk. Sælgæti að njóta. Ljósmynd/Sindri Swan

Í upphafi nýrra viku er ávallt vinsælt að bjóða upp á fisk í matinn. Steiktur fiskur í raspi nýtur vinsælda hjá mörgum og heimalagað remúlaði er það sem flestir vilja fá með steikta fiskinum sínum. Theodór Haraldsson matreiðslumeistari í mötuneyti ÚA bauð upp á steiktan fisk í raspi með heimalöguðu remúlaði og brúnuðum lauk. Rétturinn sló í gegn í mötuneytinu og mikil eftirspurn var eftir uppskriftinni. Hann deilir hér með lesendum matarvefsins uppskriftinni sinni hvernig hann eldar steikta fiskinn og lagar meðlætið sem einnig birtist á heimasíðu Samherja hér.

„Það eru auðvitað mikil forréttindi að hafa gott aðgengi að fyrsta flokks hráefni, auk þess sem fiskur er alltaf vinsæll hérna í mötuneytinu,“ segir Theodór.

Með á diskinn með steikta fiskinum settur Theodór líka fersk salat og sítrónusneiðar. Girnileg máltíð. Ljósmynd/Sindri Swan

Steiktur fiskur í raspi með remúlaði og brúnuðum lauk

Fiskur í raspi

Fyrir 4-6

1,5 g Þorskur
6 egg
500 g rasp
500 g hveiti
50 g salt
50 g hvítur pipar
2 msk. sítrónupipar
Allt að verða tilbúið
1 msk. paprikukrydd
1 msk. karrí
1 msk. laukduft
Ólífuolía
Klípa af smjör

Aðferð:

Skerið þorskinn niður í hæfilega bita.
Pískið eggin saman í skál ásamt kryddum.
Veltið fiskinum velt upp úr hveiti, veltið upp úr eggjunum og svo í lokin upp úr raspinu. Steikið fiskinn síðan á pönnu upp úr smá olíu og klípu af smjöri.

Remúlaði

50 g majónes
50 g súrmjólk
1 stk. laukur fínt saxaður
3 msk. dijon sinnep
1 msk. sætt sinnep
75 g súrar gúrkur
2 msk. kapers saxaður

Aðferð:

Blandið þessu öllu saman og smakkið til.

Brúnaður laukur

2 stk. laukur
1 msk. steinselja þurrkuð
Olía til steikingar
Smá klípa smjöri

Aðferð:

Sneiðið laukinn niður og steikið á pönnu þangað til hann verður fallega brúnn á litinn.
Bætið þá við smá smjöri á pönnuna og látið laukinn malla í nokkrar mínútur til viðbótar.
Berið steikta fiskinn fram remúlaði, soðnum kartöflum, brúnuðum lauk og sítrónusneið.