Matur | mbl | 11.5.2024 | 6:30 | Uppfært 8:46

Húsó-lagtertan fræga sem allir geta gert

Húsó-lagtertan góða nýtur mikilla vinsælda. Samsett mynd

Fastur liður á laugardagsmorgnum á matarvefnum eru leyndardómsfullu uppskriftirnar úr Húsó-eldhúsinu í Hússtjórnarskólanum sem njóta mikilla vinsælda hjá lesendum matarvefsins. Að þessu sinni deilir Marta María Arnarsdóttir skólameistari Hússtjórnarskólans með lesendum uppskrift að lagtertu með hvítu kremi sem gjarnan er kölluð Húsó-lagtertan. Lagtertan stendur ávallt fyrir sínu og er afar góð með helgarkaffinu.

„Það er opið hús hjá okkur í skólanum í dag, laugardag, 11. maí og það verður hægt að kaupa lagtertuna á opna húsinu á morgun fyrir þá sem ekki nenna að baka að þessu sinni,“ segir Marta María sposk á svipinn. Einnig verður margt annað til sölu bæði góðgæti og handverk eftir nemendur Húsó.

Frétt af mbl.is

Kjörið tækifæri til að heimsækja Húsó

Hér er uppskriftin komin og hver uppskrift dugar í átta bita af lagtertu. Einnig eru myndasería hér fyrir neðan sem sýnir í grófum dráttum skref fyrir skref hvernig lagtertan er gerð.

Lagtertan ljúfa í Húsó Ljósmynd/Marta María Arnarsdóttir

Húsó-lagtertan fræga sem allir geta gert

Húsó-lagterta

675 g smjör
675 g púðursykur
3 stór egg eða 4 lítil
1,125 g hveiti
4 ½ tsk. negull
4 ½ tsk. kanill
4 ½ tsk. matarsódi
6-7 dl mjólk

Hrært deig

Hrærið smjörið ljóst með sykrinum.
Setjið eggin út í eitt í einu, hrærið vel á milli.
Blandið þurrefnunum saman við ásamt mjólkinni, varist að hræra of mikið.
Skiptið deiginu í 4 hluta og smyrjið á bökunarplötu klædda bökunarpappír.
Bakið í miðjum ofni við 180°C -200°C hita í um það bil 10-12 mínútur.
Leggið plöturnar saman með smjörkremi (uppskrift hér fyrir neðan) og sultu.
Látið botnana kólna fyrir samsetningu.
Leggið plöturnar/botnana saman með smjörkremi (uppskrift hér fyrir neðan) og sultu.
Langbest að smyrja fyrsta botninn á hvolfi. Hinir geta síðan komið hver á eftir öðrum á „réttunni“.
Það er síðan best að setja hlass ofan á kökurnar og skera þær í átta bita daginn eftir. Þá er best að vera búinn að mæla bitana út með reglustiku áður en skorið er svo bitarnir verði jafnarma.
Skerið kantana af svo kantarnir séu beinir og snyrtilegir.

Smjörkrem

1 stk. smjör (500 g)
1,5 kg flórsykur
3 egg
1 msk. vanilludropar

Aðferð:

Hrærið smjör og flórsykur saman.
Bætið eggjum og vanilludropum saman við og hrærið vel.

Deigið er smurt á bökunarpappír á sléttri ofnplötu. Ljósmynd/Marta María Arnarsdóttir

Næsta skref er að smyrja deigið á bökunarpappírinn. Ljósmynd/Marta María Arnarsdóttir

Deigið er bakað í ofni við 180°C -200°C hita í um það bil 10-12 mínútur. Síðan eru botnarnir látnir kólna áður en kremið og sultan eru sett á. Ljósmynd/Marta María Arnarsdóttir