Síðastliðinn fimmtudag útskrifuðust 13 bakarar með sveinspróf í bakaraiðn og hafa því fengið réttindi til að kalla sig bakara. Þetta er stór áfangi fyrir greinina en aldrei hafa fleiri þreytt sveinspróf síðan árið 2000 eða í aldarfjórðung. Hópurinn samanstendur af 7 stelpum og 6 strákum. Bakaraiðnin hefur lengi verið karlæg, en þessi fjölgun bendir til jákvæðrar þróunar.

Skráning í námið farið fram úr væntingum

Hótel- og matvælaskólinn hefur fundið fyrir auknum áhuga ungs fólks á bakstri. Skráning í bakaranámið fyrir komandi haust hefur nú þegar farið fram úr væntingum en ekki er endanlega búið að ganga frá skráningu fyrir næsta skólaár.

Hver er skýringin á þessari fjölgun?

„Erfitt er að segja með vissu, en augljóst er að skýringin er jákvæð. Samfélagsmiðlar hafa einnig spilað stórt hlutverk í að kynna bakaraiðnina fyrir ungu fólki á nýjan hátt,“ segir Árni Þorvarðarson fag­stjóri í bak­araiðn hjá Hót­el- og mat­væla­skól­an­um í Kópa­vogi.

„Það er mikilvægt að námið haldi í við tíðarandann en einnig að gleyma ekki sögunni og klassískum aðferðum. Með áframhaldandi áhuga ungs fólks er von á fleiri ungum bökurum sem leita sér af tækifærum bæði innanlands og erlendis. Þetta styrkir greinina og gefur nemendum verðmæta reynslu,“ bætir Árni við.

„Baksturinn er því ekki bara vandræði, heldur tækifæri til að skapa ljúffenga og skapandi framtíð fyrir nýja kynslóð bakara. Með áherslu á nýsköpun, hefðbundnar aðferðir og alþjóðlegan metnað, eru þessir nýju bakarar tilbúnir að mæta kröfum framtíðarinnar,“ segir Árni að lokum.

Þessi luku sveinsprófi

Eftirtaldir bakaranemar luku sveinsprófi og hafa nú fengið titilinn bakarar:

Birgir Fannar Sigurðarson – Almar bakari

Darri Dór Orrason – Reynir bakari

Finnur Guðberg Ívarsson Prigge – Kökulist/Bláa lónið

Guðbjörg Ósk Andreasen Gunnarsdóttir – Brikk

Gunnar Jökull Hjaltason – Mosfellsbakarí

Hekla Guðrún Þrastardóttir – Hygge

Karen Guðmundsdóttir – Gulli Arnar

Lovísa Þórey Björgvinsdóttir – Bæjarbakarí

Matthildur Ósk Guðbjörnsdóttir – Gulli Arnar

Mikael Sævarsson – Kalla bakarí

Óli Steinn Steinþórsson – Gæðabakstur

Pálmi Hrafn Gunnarsson – Ikea

Sunneva Kristjánsdóttir – Sandholt

„Þessi fjölgun bakara gefur góð fyrirheit um framtíðina og vekur vonir um enn meiri vöxt og framþróun í bakaraiðninni,“ segir Sigurður Már Guðjónsson formaður LABAK og formaður sveinsprófsnefndarinnar og bætir við glæsileg sveinspróf eins og þessi boði bjarta framtíð fyrir stéttina.

Matarvefurinn óskar nýútskrifuðum bökurum til hamingju með sveinsprófið.

Sjáið glæsiegu kræsingarnar sem nýútskrifuðu bakararnir töfruðu fram á sveinsprófinu.