Matur | mbl | 9.6.2024 | 12:30

Ilmandi Móbergsskonsur með eplum og kanil

Brynja Dadda Sverrisdóttir hefur mikla ástríðu fyrir bakstri í eldhúsinu sínu í Móberginu. Hér er hún búin að baka dýrðlega skonsur. Samsett mynd

Hér er á ferðinni dýrðleg uppskrift að skonsum með kanil og eplum sem steinliggja með sunnudagskaffinu. Uppskriftin kemur úr smiðju Brynju Döddu Sverrisdóttur ofan úr fjallinu í Kjós, Móberginu fræga og því köllum við skonsurnar Móbergsskonsur. Brynja Dadda hefur ástríðu fyrir bakstrinum og heillar alla sína gesti með sínum ómótstæðilegu kræsingum sem hún ber á borð þegar gesti ber að garði.

„Skonsurnar eru bestar nýjar, ef þær klárast ekki á fyrsta degi er sniðugt að setja þær í frost og taka síðan út þegar á að njóta,“ segir Brynja Dadda. Nú er bara að prófa og njóta.

Móbergsskonsur með eplum og kanil

20 - 24 bollur – allt eftir stærð

350 g hveiti
2 tsk. kanill
1,5 tsk. lyftiduft
0,5 tsk. salt
90 g kalt smjör
100 gr flórsykur
1 epli, skorið mjög smátt
1,5 dl hreint jógúrt
1,5 dl rjómi (eða mjólk)

Aðferð:

Byrjið á því að hita ofninn í 200°C.
Setjið hveiti, kanill, lyftiduft og salt saman í skál og hrærið vel saman. Myljið kalt smjör út í, má raspa út ef vill.
Setjið síðan sykurinn settur út í og síðan eplabitana.
Blönduna má hræra í vél en líka alveg hægt að hræra í höndum.
Bætið loks blautefnum saman við, mjólk og jógúrti og hrærið.
Ef þið viljið hafa skonsurnar kringlóttar eða þríhyrningslaga, getið þið skellt deiginu á borð og skorið út hringi eða þríhyrnur en Brynju Döddu finnst bara fínt að moka þessu með stórri skeið (eins og salat- eða ísskeið) beint á plötu. Skonsur mega alveg vera grófar og óreglulegar í laginu.
Ef þið viljið meira sætabrauð má strá örlitlum hrásykri yfir deigið áður en það fer inn í ofn.
Setjið síðan inn í heitan ofninn og fylgist vel með tímanum. Þegar það eru komnar 15 mínútur til 18 mínútur ættu þær að vera tilbúnar. Stórar bollur/skonsur þurfa alveg 18 mínútur eða meira.
Takið út þegar liturinn er orðinn fínn á yfirborði og botni. Kælið pínulítið og síðan er bara að bera skonsurnar fram með því sem hugurinn girnist og njóta. Smjör og ostur passar fínt en þarf ekkert endilega.