Sólin er loksins farin að skína þá langar manni létta og ferska köku sem passar vel með freyðandi drykkjum. Sítrónukökur eiga vel við á góðum sólardögum og hér er komin uppskrift að nýstárlegri sítrónu- og bláberjaformköku sem á eftir að hitta í mark þegar sólin skín.
Heiður af þessari dýrindis sítrónu- og bláberjaformköku á Guðrún Ýr Eðvaldsdóttir hjá Döðlur og smjör. Kakan er mjúk og sæt og sítrónusúr glassúrinn ofan á er fullkominn með kaffibollanum eða freyðandi búbblum út í sólinni.
Sítrónu- og bláberjaformkaka
- 200 g sykur
- börkur af einni sítrónu
- 120 g smjör, brætt
- 2 egg
- ½ tsk. salt
- 2 tsk. lyftiduft
- 200 g hveiti
- 1 dl grísk jógúrt
- 1 tsk. vanilludropar
- 2 msk. sítrónusafi
- 2,5 dl bláber
Aðferð:
- Stillið ofn á 180°C hita.
- Setjið sykur í hrærivélarskál og rífið sítrónubörkinn saman við.
- Nuddið honum létt saman við sykurinn með fingrum.
- Bræðið þá smjör og blandið saman við sykurinn, hrærið í 3-5 mínútur saman þangað til að blandan er orðin ljós.
- Bætið þá eggjunum saman við einu í einu og hrærið vel.
- Bætið þá salt, lyftidufti og hveiti saman við og hrærið.
- Þá er grísku jógúrtinni, vanilludropum og sítrónusafa bætt við og hrært saman.
- Setjið bláberin í skál með smá hveiti og blandið saman með skeið þangað til að berin eru hjúpuð hveiti og bætið þeim saman við deigið og hrærið þeim saman með sleikju
- Setjið bökunarpappír í formkökuform og hellið deiginu í formið. Sléttið úr að því að ofan og setjið inn í ofn og bakið í 55-60 mínútur.
- Gott er að stinga prjón eða hníf í kökuna og þegar prjóninn kemur hreinn út er kakan klár.
Glassúr
- 2 dl flórsykur
- 2-3 msk. sítrónusafi
Aðferð:
- Blandið saman flórsykri og sítrónusafa og hellið yfir kökuna þegar hún hefur kólnað lítillega.
- Berið fram og njótið í sólinni.