Unnur Birta Sævarsdóttir er mikil ískona og veit hvernig búa á til góðan ís. Hún er ein af fjölmörgum starfsmönnum Ísbúðarinnar Huppu sem var stofnuð á Selfossi árið 2013 af vinkonunum Telmu Finnsdóttur og Eygló Rún Karlsdóttur og mökum þeirra, þeim Gunnari Má Þráinssyni og Sverri Rúnarssyni.
Unnur Birta starfar sem verslunarstjóri Huppu á Seltjarnarnesi samhliða námi í uppeldis-menntunarfræði við Háskóla Íslands.
Blaðamaður matarvefjarins forvitnaðist aðeins um vinsælasta ísinn og uppáhaldsís Unnar Birtu.
Hvað er skemmtilegast við að vinna í ísbúð?
„Persónulega finnst mér skemmtilegast að útbúa alls konar íspantanir, hvort sem það eru bragðarefir eða ís í boxi. Fólk mætir oft og biður um áhugaverðar og heldur óvenjulegar blöndur í bragðarefina.
Á kvöldin myndast líka skemmtileg stemning, þá er mikið að gera og allir á fullu að búa til ísa. Einnig er mjög gaman að taka á móti túristum sem þekkja ekki ísmenninguna hér á landi, þeir fá gjarnan smá valkvíða yfir öllu framboðinu og leyfa mér að velja eitthvað skemmtilegt. Valið slær alltaf í gegn.“
Hver hefur verið vinsælasti ísinn í sumar og af hverju?
„Í sumar hefur Oreo-sjeikinn verið að slá í gegn, klárlega vinsælasti sjeikinn. Hann er góður í öllum veðrum. Ég verð einnig að nefna Draumarefinn, fólk fær ekki nóg af þeim bragðaref.“
Hver er uppáhaldsísinn þinn og af hverju?
„Ég fæ mér alltaf Huppu-ísinn. Það er ótrúlegt hvað ég get borðað mikið af ís. Uppáhaldið mitt þessa stundina er bragðarefur með Kinder-egg ídýfu, lakkrískurli og kökudeigi. Ég á líka erfitt með að standast kökudeigs-sjeikinn. Hann er svo góður.“