Matur | Neytendur | mbl | 29.8.2024 | 13:20 | Uppfært 30.8.2024 13:03

Verðið lækkar mest í Nettó

Gunnar Egill Sigurðsson, forstjóri Samkaupa segir að þau hafi gengið enn lengra en áður í þeirri vegferð að lækka vöruverð. Ljósmynd/Nettó

Verð í verslunum Nettó lækkaði mest allra verslana á milli júlí og ágúst samkvæmt mælingum Verðlagseftirlits ASÍ. Er tekið fram í greiningu ASÍ að hjá Nettó hafi verð í langflestum vöruflokkum lækkað, þeirra mest flokkur léttmjólkur, um 4,4%.

Þetta kemur fram í tilkynningu frá fyrirtækinu.

„Frá því í janúar hefur verð lækkað í helstu vöruflokkum í Nettó, og mun verslunin halda áfram að spyrna gegn verðhækkunum með markvissum hætti. Síðustu vikur höfum við gengið enn lengra en áður í þessari vegferð og lækkað verð verulega á mörgum mikilvægum nauðsynjavörum,“ er haft eftir Gunnari Agli Sigurðssyni, forstjóra Samkaupa, í tilkynningunni.

„Árangurinn sést meðal annars í nýlegri greiningu frá Verðlagseftirliti ASÍ, en þar kemur fram að á milli júlí og ágúst lækkaði matvöruverð mest í verslunum Nettó. Við þetta má bæta að Verðlagseftirlitið mælir ekki verð á öllum vörum og að lækkanir Nettó eru enn meiri en mælingar ASÍ gefa til kynna,“ bætir hann við.

Markmið að lækka verðið á innkaupakörfunni

Stefna Nettó er að bjóða eftir fremsta megni fjölbreytt vöruúrval á breiðu verðbili, ásamt því að tryggja samkeppnishæft verð á helstu nauðsynjavörum heimilisins. Á þessu ári hefur Nettó endurskoðað verðlagningu í ýmsum vöruflokkum, með það að markmiði að lækka verðið á innkaupakörfunni, segir í tilkynningunni.

„Þessi vegferð verðlækkana hefur kallað á mikla vinnu og krafist útsjónarsemi, en það er ánægjulegt að sjá árangurinn raungerast. Í dag birti Hagstofan nefnilega nýjar verðbólgutölur og þar sést að í fyrsta skipti í þrjú ár lækkar matvöruverð á milli mánaða. Nam lækkunin 0,5% og hefur það áhrif til lækkunar vísitölu neysluverðs. Markmið okkar allra á að vera að ná verðbólgu niður og við erum stolt af þeim árangri sem við hjá Nettó höfum náð,“ ef haft eftir Gunnari Agli.

Uppfært 30. ágúst kl. 9:18

ASÍ hefur sent frá sér athugasemd þar sem fram kemur að í eftirfarandi fréttatilkynningu frá Samkaup sé ekki minnst á að í sömu frétt sé tekið fram að verð í Nettó hafi hækkað mest í mánuðinum á undan. Þar segir: „Verðlag í Nettó, Kjörbúðinni og Krambúðinni hækkaði umtalsvert í júlí eins og verðlagseftirlitið benti á í nýlegri verðkönnun. Verðlag þar lækkaði hins vegar í ágúst.“.

Í könnun sem eftirlitið gerði í júlí var þetta áður til umfjöllunar, sjá hér.

Hið rétta er að um 70% af vörum í Nettó eru á hærra verði núna en þær voru í júní, fyrir þessa hækkun/lækkun þróun.