Matur | mbl | 2.10.2024 | 18:00

Ljúffengur gratíneraður þorskur sem er ekkert vesen að elda

Gratíneraður þorskur með sinnepsrjóma hljómar ágætlega í kvöldverð. Ljósmynd/Helena Gunnarsdóttir

Þetta er ljúffengur fiskréttur, gratíneraður þorskur með sinnepsrjóma, sem einfalt er að elda og ekkert vesen. Allt hráefnið í einu fati og útkoman verðu gómsæt, hversdags og getur líka verið spari. Helena Gunnarsdóttir matgæðingur hjá Eldhúsperlum á heiðurinn að þessari uppskrift sem birtist á uppskriftavefnum Gott í matinn.

Gratíneraður þorskur í sinnepsrjóma

Fyrir 4

750 g þorskur eða annar hvítur fiskur
1 stk. brokkolí- eða blómkálshaus
2 dósir sýrður rjómi 18%
2 msk. dijon sinnep
1 msk. grófkorna sinnep
2 msk. saxaður kapers
½ stk. blaðlaukur, smátt saxaður
rifinn pítsa-, gratín- eða mozzarella ostur
salt og pipar eftir smekk
smjör eftir smekk
fersk steinselja eftir smekk
kirsuberjatómatar eftir smekk

Aðferð:

Hitið ofn í 220°C með blæstri.
Smyrjið eldfast mót með smá smjöri.
Skerið blómkál eða brokkolí smátt og setjið í botninn á eldfasta mótinu.
Saltið og piprið eftir smekk.
Skerið fiskinn í passlega bita, þerrið, saltið og piprið og leggið ofan á grænmetið.
Hrærið saman sýrðum rjóma, sinnepi, kapers og blaðlauk.
Smakkið til með salti og pipar.
Smyrjið ofan á fiskinn.
Stráið dálitlum rifnum osti yfir og bakið í 20 mínútur inni í ofni.
Berið fram með hrísgrjónum, salati og/eða góðu brauði.