Matur | mbl | 12.10.2024 | 6:30

Heimagerð Húsó-blómkálssúpa slær í gegn

Heimagerð blómkálssúpa er herramannsmatur. Ljósmynd//Aðsend

Marta María Arnarsdóttir skólameistari Hússtjórnarskólans deilir uppskrift af gómsætri blómkálssúpu. Súpan iljar á köldum haustdögum og er á sama tíma ljúffeng.

Blómkálssúpa passar sem kvöldmatur en það má líka bera hana fram sem forrétt ef gesti ber að garði.

Matarboð í heimahúsum njóta mikilla vinsælda um þessar mundir og því ekki úr vegi að búa til matarmikla súpu frá grunni og slá þannig um sig.

Heimagerð Húsó-blómkálssúpa slær í gegn

Blómkálssúpa Húsó

1 L vatn
½ blómkálshöfuð
50 g smjör
50 g hveiti
2 kjötkraftsteningar
½ tsk. laukduft
1 dl rjómi eða matreiðslurjómi
Salt pipar

Aðferð:

Hreinsið og takið blómkálið í sundur í hæfilega súpubita.
Látið í sjóðandi vatn og sjóðið í 2 mínútur.
Veiðið upp úr pottinum og látið bíða í lokuðu íláti.
Bætið kryddi og kjötkrafti saman við soðið.
Blandið hveiti saman við smjörið þannig að úr verði bolla, blandið með gaffli eða píski.
Látið smjörbolluna út í soðið og bræðið bolluna við vægan hita þar til bollan jafnast út.
Bætið blómkáli og rjómanum út í og látið sjóða í 5 mínútur.
Bragðbætið eftir smekk, notið salt og pipar til þess.
Ef súpan er of þykk getið þið bætt í hana soði/mjólk eða rjóma.