Dag­ana 8. og 9. októ­ber síðastliðna fór fram undan­keppni í hinni ár­legu nema­keppni Korn­ax, sem hef­ur verið hald­in frá ár­inu 1998.

Nem­un­um var skipt í þrjá hópa og fengu þeir út­hlutað það verk­efni að baka tíu malt­brauð, þrjár út­færsl­ur af vín­ar­brauði og að út­búa sér­stakt sýn­ing­ar­stykki. Verk­efn­in reyndu á bæði tækni og sköp­un­ar­gáfu og það var mik­il spenna í loft­inu þegar verk nem­anna voru dæmd af dóm­nefnd­inni.

Sýna mikla fag­mennsku og list­fengi

„Það er ein­mitt þetta sem ger­ir keppn­ina svo ein­staka og skemmti­lega, að sjá hvernig kepp­end­ur þrosk­ast og dafna á ótrú­lega stutt­um tíma. Marg­ir koma í keppn­ina með efa­semd­ir um eig­in hæfi­leika og telja sig ekki eiga er­indi á þenn­an vett­vang, en inn­an skamms tíma eru þeir komn­ir á allt ann­an stað. Að lok­um skila þeir af sér verk­um sem sýna mikla fag­mennsku og list­fengi. Þetta ferli er ekki aðeins mik­il­vægt fyr­ir nem­ana sjálfa, held­ur líka fyr­ir bak­araiðnaðinn á Íslandi, þar sem það hjálp­ar til við að móta framtíðarbak­ara með framúrsk­ar­andi hæfi­leika. Við meg­um sann­ar­lega vera stolt af því að eiga svona hæfi­leika­ríka til­von­andi bak­ara sem framtíðin á eft­ir að njóta góðs af,“ seg­ir Árni Þor­varðar­son, bak­ari og fag­stjóri við Hót­el- og mat­væla­skól­ann í Kópa­vogi.

Keppn­in var hald­in í sam­starfi við Hót­el- og mat­væla­skól­ann, Korn­ax, Klúbb bak­ara­meist­ara og Lands­sam­band bak­ara­meist­ara.

„Eins og fyrr seg­ir hef­ur keppn­in verið fast­ur liður nán­ast á hverju ári í 26 ár. Flest­ir af okk­ar bestu bök­ur­um hafa tekið þátt í henni á ein­hverj­um tíma­punkti í sinni mennt­un. Keppn­in er því orðin mik­il­væg­ur viðburður inn­an bak­araiðnaðar­ins og hef­ur skipað sér sess sem vett­vang­ur til að sýna fram á hæfni, sköp­un­ar­kraft og fag­mennsku þeirra sem eru að stíga sín fyrstu skref í fag­inu,“ bæt­ir Árni við.

6 bestu komust áfram í úr­slit­in

Alls hófu 18 bak­ara­nem­ar keppn­ina og eft­ir hörku­keppni komust 6 bestu áfram í úr­slit­in, sem fara fram að viku liðinni. Í úr­slit­un­um þurfa kepp­end­ur að bæta við tveim­ur nýj­um verk­efn­um og jafn­framt betr­um­bæta verk þau sem þeir skiluðu í undan­keppn­inni. Það verður því spenn­andi að sjá hvernig þeir glíma við þessi krefj­andi verk­efni og hvaða hug­mynd­ir og út­færsl­ur þeir koma með að þessu sinni.

Kepp­end­ur sem komust í úr­slit eru:

• Anna Kol­brún Stef­áns­dótt­ir frá Gulla Arn­ari
• Jean Lou­is Aimé Al­ex­andrenne frá Gæðabakstri
• Kara Sól Ísleifs­dótt­ir frá Mos­fells­baka­ríi
• Kar­en Lilja Sveins­dótt­ir frá Gulla Arn­ari
• Tinna Sæ­dís Ægis­dótt­ir frá Gulla Arn­ari
• Guðbjörg Skarp­héðins­dótt­ir frá Kök­ulist

Úrslit­in fara fram dag­ana 16. og 17. októ­ber næst­kom­andi og afrakst­ur kepp­enda verður til sýn­is næst­kom­andi fimmtu­dag, 17. októ­ber, klukk­an 16 í mat­sal Hót­el- og mat­væla­skól­ans.

Munu sýna afrakst­ur sinn

„Þar munu kepp­end­ur sýna afrakst­ur sinn og við hvetj­um alla áhuga­sama til að koma og njóta þess að sjá bakst­ur­inn í sinni feg­urstu mynd. Það er ekki á hverj­um degi sem við fáum tæki­færi til að sjá framtíðar­meist­ara bakst­urs á Íslandi koma fram á þenn­an hátt, og það lof­ar góðu fyr­ir framtíðina að sjá þessa hæfi­leika­ríku nema búa til verk sem blanda sam­an tækni, sköp­un og list,“ seg­ir Árni að lok­um.