Matur | Veitingastaðir | mbl | 10.12.2024 | 10:00

Skötuveisla verður haldin í einum rómaðasta veislusal landsins

Skötuveisla verður haldin á Þorláksmessu í Sjálandinu. Stórfenglegt útsýni er út um gluggana í veislusalnum. Ljósmynd/Aðsend

Sjáland í Garðabæ þykir vera er einn rómaðasti veislu- og viðburðastaður landsins og stendur við sjávarsíðuna í bænum með stórfenglegu útsýni. Frá því að fjölskyldan í Múlakaffi tók við rekstrinum fyrr á árinu hefur hann gengið í endurnýjun lífdaga með fjölbreyttri viðburðadagskrá og glæsilegum veitingum í föstu og fljótandi formi.

Í ár ætlar Múlakaffi, í fyrsta skipti, að standa fyrir glæsilegri skötuveislu í Sjálandi á Þorláksmessu. „Skötuveislan okkar í Hallarmúlanum er náttúrulega hefð sem allir þekkja en í ár langaði okkur til að nýta þessa glæsilegu aðstöðu í Sjálandi og halda öðruvísi skötuveislu þar sem gestir geta notið bæði glæsilegra veitinga og skemmtiatriða,“ segir Guðríður María Jóhannesdóttir, framkvæmdastjóri Múlakaffis.

Þríeykið Eyþór Rúnarsson, Ísak Aron Jóhannsson og Ari Sylvain Posocco skipa veisluteymið hjá Múlakaffi sem ætlar að töfra fram skötuveisluna í Sjálandi. mbl.is/Arnþór

Skötuveisla af allra bestu gerð

Það er landsliðið í veisluþjónustu undir stjórn listakokksins Eyþórs Rúnarssonar sem sér um veitingarnar í skötuveislunni. Nýverið bættist fyrirliði íslenska kokkalandsliðsins, Ísak Aron Jóhannsson, í veisluþjónustuteymið og hefur hann komið með ferska strauma í veitingaframboðið hjá Múlakaffi. Það er því óhætt að gera ráð fyrir skötuveislu af allra bestu gerð.

„Skatan er að sjálfsögðu í aðalhlutverki og lofa matreiðslumeistarar Múlakaffi alvöru kæsingu í ár. Mörfeitin og hnoðmörinn verða á sínum stað ásamt soðnu rófunum og kartöflunum. Og fyrir þá sem eru ekki komnir á skötuvagninn verður hátíðarplokkfiskur og soðinn saltfiskur. En það er ekki allt, glæsilegir forréttir og eftirréttir toppa skötuveisluna. Þar má finna ýmiss konar bragðbætta síld ásamt graflaxi og reyksoðinni bleikju. Rúsínan í pylsuendanum er svo Ris al la Mande ásamt gómsætum kökum og rjóma,“ segir Guðríður með bros á vör.

Það er svo hinn eini sanni Mick Jagger, Björn Stefánsson, sem mun skemmta veislugestum af sinni alkunnu snilld.

Eins og áður sagði fer skötuveislan fram á Þorláksmessu og einungis er hægt að bóka 6 og 10 manna borð. Tvær tímasetningar verða í boði, klukkan 11.00 og klukkan 14.00 og hafa veislugestir því rúman tíma til að njóta og gleðjast.

Borðabókanir fara fram í gegnum vef Dineout. Um takmarkað sætaframboð er að ræða og því ljóst að færri komast að en vilja.