Matur | mbl | 30.12.2024 | 16:15 | Uppfært 20:00

Þetta verður nýárseftirrétturinn hans Finns

Bakarinn knái ætlar að bjóða upp á dýrðlegan eftirrétt þegar nýja árinu er fagnað. Rétturinn ber enska heitið „Baked Alaska“ og er í raun eins og eldur og ís. mbl.is/Eyþór

Finnur Prigge bakari ætlar að bjóða upp á þennan himneska eftirrétt um áramótin eða á nýársdag og mun án efa bera hann fram með stjörnuljósum. Rétturinn ber enska heitið „Baked Alaska“ sem er viðeigandi á þessum tímamótum. Eldur og ís í forgrunni.

Þessi eftirréttur er guðdómlega fallegur. Ljósmynd/Finnur Prigge

Finnur er meðlimur í landsliði íslenskra bakara og er einstaklega hæfileikaríkur bakari. Hann hefur verið iðinn við að þróa sínar eigin uppskriftir og deila með lesendum á árinu sem er að líða. Sjáið handbragðið hér fyrir neðan:

Watch on TikTok

Það er eins og halastjarnan sé mætt á diskinn. Ljósmynd/Finnur Prigge

Þetta verður nýárseftirrétturinn hans Finns

„Baked Alaska“

Hindberjagel

450 g frosin hindber
100 g sykur
3 blöð matarlím

Aðferð:

Þíðið hindberin.
Leggið matarlímið í ískalt vatn og setjið til hliðar.
Setjið hindberin og sykur í pott og hitið að suðu.
Kreistið matarlím í skál, sigtið hindberjablönduna og blandið saman.
Setjið í kæli í að minnsta kosti 4 klukkustundir.
Setjið í blandara eða notið töfrasprota til að mýkja upp gelið.

Möndlu-svampbotnar

4 egg
150 g sykur
120 g hveiti
15 g lyftiduft
15 g kakó
40 g hakkaðar möndlur

Aðferð:

Hitið ofninn í 220°C og stillið á blástur.
Þeytið egg og sykur þar til létt og ljóst.
Hrærið þurrefnin saman í skál og blandið varlega við eggjablönduna.
Smyrjið deiginu varlega á smjörpappír.
Bakið í 8-12 mínútur (best að pota í botninn og sjá hvort hann komi upp til baka).

Einfaldasti vanilluísinn

500 ml rjómi
1 dós niðursoðin mjólk, ( 400 g)
Vanillu-paste eftir smekk

Aðferð:

Léttþeytið rjómann.
Blandið vanilluni og niðursoðnu mjólkinni saman við rjómann í nokkrum hlutum og þeytið.

Ítalskur marens

180 g sykur
60 g vatn
3 eggjahvítur

Aðferð:

Setjið sykur og vatn í pott og á hellu.
Þegar suðan kemur upp setjið þið eggjahvíturnar í hrærivél og þeytið.
Þegar eggjahvíturnar eru orðnar aðeins stífari en raksápa hellið þið sykurvatninu sjóðandi heitu út í í mjórri bunu, á miðlungshraða.
Þeytið þar til hrærivélarskálin er ekki lengur heit.

Samsetning:

Setjið matarfilmu í litlar skálar svo auðveldara sé að losa ísinn úr.
Sprautið ísblöndunni í 2/3 af skálinni.
Sprautið hindberjageli eftir smekk.
Skerið út hringi í svampbotninn og þrýstið þeim ofan í ísinn.
Frystið yfir nótt.
Gerið ítalskan marens.
Takið ísinn úr skálunum með því að hvolfa honum á disk.
Sprautið eða smyrjið ítalska marengnum utan á og brennið með öflugum kveikjara eða gasbrennara.
Skreytið diskinn með hindberjagelinu.
Geymið við stofuhita í 10 mínútur áður en þið berið fram.
Njótið vel og berið jafnvel fram með stjörnuljósi.