Matur | mbl | 12.1.2025 | 12:30

Appelsínusósan ljúfa

Frábær appelsínusósa, einföld og góð og passar mjög vel með önd. Ljósmynd/Hanna Thordarson

Hanna Thordarson birti uppskriftina að þessari ljúfu appelsínusósu á heimasíðu sinni en hún segir að sósan komi úr smiðju Vigfúsar.

„Sósan er bæði einföld og sérstaklega góð. Hún á mjög vel við með andabringum og er algjörlega óhætt að mæla með henni með ýmsu kjöti.Hún er góð daginn eftir sama hvort hún er borin fram heit eða köld,“ segir Hanna sem er afar ánægð með þessa afurð.

Appelsínusósa

Fyrir 3-4

Safi úr 3 appelsínum (2½ dl) – kjötið sigtað frá
1 msk. sojasósa
1 tsk. kjötkraftur (t.d. andakraftur eða nautakraftur)
2½ dl rjómi
Salt og pipar eftir smekk
Vökvi, sem kemur af kjöti, eða ögn af andafitu ef hún er í boði, má sleppa

Aðferð:

Byrjið á því að sigta appelsínusafann ofan í pott og látið suðuna koma upp.
Mikilvægt er að láta sýruna sjóða vel úr en vegna uppgufunar minnkar magnið og safinn þykknar aðeins. Það má gera ráð fyrir að vökvinn rýrni um helming
Blandið sojasósu, kjötkrafti og rjóma saman við og látið suðuna koma upp.
Sósan er frekar þunn en þykknar ef hún fær að malla aðeins.
Þið sem viljið hafa sósur mjög þykkar getið sett sósujafnara út í, um það bil 1- 2 msk. og látið suðuna koma upp.
Sósan geymist ágætlega í lokuðu íláti í kæli.