Matur | mbl | 14.1.2025 | 14:05

Einföld og fljótgerð kjúklingabaka

Mexíkósk kjúklingabaka sem allir geta gert og yngri kynslóðin elskar. Ljósmynd/Svava Gunnarsdóttir

Þessi kjúklingabaka er ómótstæðilega góð og það er ofureinfalt að gera hana. Svona réttir slá gjarnan í gegn hjá yngri kynslóðinni og það er upplagt að leyfa börnunum að taka þátt í matseldinni. Uppskriftin kemur úr smiðju Svövu Gunnarsdóttur hjá Ljúfmeti og lekkerheit en hún á gott safn af girnilegum uppskriftum sem njóta sín enn í dag.

Gott er að bera bökuna fram með góðu salati, nachos, sýrðum rjóma og guacamole. Ljósmynd/Svava Gunnarsdóttir

Mexíkósk kjúklingabaka

Botn

3 dl hveiti
100 g smjör
2 msk. vatn

Aðferð:

Hitið ofninn í 225°C.
Blandið hráefninu í botninn saman þannig að það myndar deigklump.
Fletjið hann út og fyllið út í bökumót eða venjulegt kökuform.
Forbakið í um það bil 10 mínútur.
Gerið næst fyllinguna.

Fylling

3 kjúklingabringur
1 laukur, hakkaður
nokkrir niðurskornir sveppir, má sleppa
1 rauð paprika, skorin smátt
150 g rjómaostur
½ dós chunky salsa
3 dl rifinn ostur

Aðferð:

Bræðið smjör á pönnu og mýkið laukinn, sveppina og paprikuna við miðlungsháan hita. Á meðan passar vel að skera kjúklingabringurnar í miðlungsstóra bita.
Takið grænmetið af pönnunni þegar það er tilbúið og steikið kjúklingabitana upp úr smjöri.
Bætið grænmetinu aftur á pönnuna ásamt rjómaostinum og salsasósunni og leyfið að malla saman um stund.
Setjið fyllinguna í forbakaðan botninn og stráið rifnum osti yfir.
Bakið þar til osturinn er bráðinn og kominn með fallegan lit.
Berið fram með góðu salati, nachos, sýrðum rjóma og guacamole.