Matur | Veitingastaðir | Morgunblaðið | 27.1.2025 | 14:00

Eins og í mat hjá mömmu

Óðinn Birgir Árnason og Tómas Þóroddsson vilja fá fólk til að borða meiri fisk. mbl.is/Ásdís

Nýr fiskistaður á Frakkastíg, Mar, lokkar nú til sín bæði Íslendinga og erlenda ferðamenn. Réttirnir eru smekklega bornir fram í koparpönnum.

Á Mar á Frakkastíg er starfsfólk í óðaönn að undirbúa kvöldið þegar blaðamaður hittir þá Tómas Þóroddsson og Óðin Birgi Árnason einn eftirmiðdag í vikunni. Þeir félagar eru báðir eigendur ásamt Árna Evert Leóssyni, en Óðinn ber ábyrgð á eldhúsinu sem yfirkokkur.

Fiskistaður í miðju landi

„Við opnuðum fyrst á Selfossi í júlí í fyrra og staðurinn sló í gegn. Þannig að þetta er í raun útibú hér í Reykjavík,“ segir Tómas, en báðir búa þeir yfir langri reynslu í veitingageiranum.

„Miðbærinn á Selfossi er svo spennandi að við ákváðum að opna þar sjávarréttastað inni í miðju landi, sem sumum fannst glapræði,“ segir Tómas og brosir.

„Það tókst rosalega vel og við opnuðum svo hér 12. desember. Við sérhæfum okkur í fiskréttum, enda er íslenski fiskurinn einstakur. Ég er líka með þá köllun að kenna yngri kynslóðinni að borða fisk; það vantar svolítið upp á það,“ segir Tómas.

„Desember gekk framar vonum og er kúnnahópurinn mjög blandaður; bæði Íslendingar og útlendingar. Hér var alveg troðfullt á aðfangadag, jóladag og gamlársdag. Það komust færri að en vildu,“ segir Óðinn.

Stökkar gellur og kinnar

„Við fáum hingað glænýjan fisk á hverjum degi og bjóðum upp á hráefni sem hentar best eftir árstíðum. Það sem er mjög vinsælt er stökkar gellur og þorskkinnar,“ segir Óðinn og útskýrir að gellurnar séu djúpsteiktar í smjöri.

„En í raun er vinsælasti rétturinn okkar forréttaplatti sem er með brot af því besta úr sjávarréttunum og er hann tilvalinn til að deila. Þar er humar, rækjur, túnfiskur, krabbaklær og fleira,“ segir Óðinn.

„Við berum flesta rétti fram í koparpönnum, sem er mjög skemmtilegt,“ segir Tómas.

„Svo erum við með einn lambarétt fyrir þá sem vilja ekki fisk,“ segir Óðinn.

Kokteilar eru hristir á Mar. mbl.is/Ásdís

Þægilegt með glamúr

Að sjálfsögðu er hægt að fá sér eftirrétt á Mar.

„Við erum með rabarbara- og eplapæ sem er líka borið fram í lítilli pönnu með vanilluís og möndluköku með bleikum glassúr, en með nýstárlegu tvisti. Við viljum hafa þetta svolítið íslenskt en aðeins búið að poppa þetta upp,“ segir Óðinn.

„Sumir segja að það að koma hingað sé eins og að koma heim í mat til mömmu en aðeins fínna. Það er tilvalið að bjóða ömmu og afa í gellur,“ segir Tómas.

„Já, þetta er þægilegt en með smá glamúr,“ segir Óðinn að lokum.

Pönnusteikt bleikja

Fyrir fjóra

1 kg bleikjuflök skorin í steikur
250 g smjör
100 g Pak choy salat
50 g skallottlaukur, gróft skorinn
10 stk kirsuberjatómatar
1 stk sítróna
500 g soðnar kartöflur skornar til helminga
1 tsk. chilliduft
20 g dill

Aðferð:

Hitið vel pönnu og bætið helmingi af smjörinu út á.
Steikið bleikjuna á kjöthliðinni fyrst mjög snögglega til þess að fá lit á hana.
Kryddið roðið með salti og pipar og örlitlu chillidufti.
Snúið bleikjunni við og bætið afgangi af smjöri við.
Leyfið bleikjunni að vera á roðhliðinni þar til borin fram.
Aðalatriðið er að roðið sé orðið stökkt.
Skallottlauk er bætt við pönnuna ásamt pak choy salati og eldið þar til fallið.
Raðið kirsuberjatómötum, sítrónu og dillgreinum fallega ofan á.