Matur | mbl | 13.2.2025 | 6:30

Góð og seðjandi hindberjakaka fyrir ástina

Rómantísk og seðjandi hindberjakaka með möndlukaramellu á vel við til að gleðja ástina. Ljósmynd/Hanna Thordarson

Þar sem langa ástarvikan er að hefjast á morgun, föstudaginn 14. febrúar, með Valentínusardegi og endar síðan á konudeginum, sunnudaginn 23. febrúar, er tilvalið að skella í eina hindberjaköku.

Þessi hindberjakaka er ekkert venjuleg, hún er bæði seðjandi og góð með möndlukaramellu. Hindberin minna á ástina og setja hana í rómantískan búning. Heiðurinn af uppskriftinni hefur Hanna Þóra Thordarson, keramiker og ástríðukokkur með meiru, sem heldur úti sínum eigin uppskriftavef.

Hindberjakaka með möndlukaramellu

Botn

175 g smjör, við stofuhita
2½ dl sykur
2 egg
2½ dl rjómi
5 dl hveiti
2 tsk. vanillusykur
1½ tsk lyftiduft
220 g hindber, fersk eða frosin
1 msk. kartöflumjöl

Aðferð:

Stillið ofninn á 175°C.
Setjið bökunarpappír í lausbotna23 cm smelluform og smyrjið formið með köldu smjöri eða olíu.
Þeytið smjör og sykur saman þar til blandan verður létt og ljós.
Bætið við einu eggi í einu og þeytið á milli.
Bætið rjóma við blönduna.
Blandið síðan saman hveiti, vanillusykri og lyftidufti í skál og hrærið síðan varlega saman við deigið
Setið deigið í formið.
Blandið síðan saman hindberjum og kartöflumjöli og setjið yfir, það er smekksatriði hvort berin eru maukuð aðeins eða látin vera heil. Þrýstið aðeins ofan í deigið.
Setjið síðan formið inn í ofn og bakið í 35 – 40 mínútur.

Möndlukaramella og skraut

75 g smjör
1 dl sykur
2 msk. mjólk
2 tsk. vanillusykur
100 g möndluflögur

Skraut

Fersk hindber og flórsykur

Aðferð:

Setjið smjör, strásykur, mjólk og vanillusykur í pott og látið sjóða í nokkrar mínútur.
Bætið við möndluflögum og hrærið saman.
Smyrjið síðan yfir kökuna og bakið hana í 15 mínútur til viðbótar.
Látið kökuna kólna í 20 mínútur í forminu.
Skreytið með ferskum hindberjum og flórsykri.
Leggið fallega á borð og kveikið á kertum og berið kökuna síðan fram með þeyttum rjóma eða vanilluís.