Matur | mbl | 17.2.2025 | 17:30

Einfaldasti mexíkóski fiskrétturinn sem sögur fara af

Mexíkóskur fiskréttur sem krakkarnir munu biðja um aftur og aftur. Ljósmynd/Árni Þór Arnórsson

Árni Þór Arnórsson matreiðslumeistari og félagi í Klúbbi matreiðslumeistara kann að matreiða sælkerarétti sem þurfa ekki mörg hráefni. Hann gerði þennan bragðgóða mexíkóska rétt sem er mögulega einfaldasti fiskréttur sem þú hefur eldað og ekki skemmir fyrir hversu vel hann smakkast.

Frábær fiskréttur fyrir alla fjölskylduna, krakkarnir eiga eftir að biðja um þennan aftur og aftur. Uppskriftina gerði Árni fyrir uppskriftavefinn Gott í matinn.

Mexíkóskur fiskréttur

Fyrir 4

800 g ýsa eða annar góður fiskur
180 g sýrður rjómi 18%
250 g paprikusmurostur
1 stk. meðalstór laukur
1 stk. græn paprika
handfylli nachos flögur
salt og nýmulinn svartur pipar eftir smekk

Aðferð:

Byrjið á því að hita ofninn í 180°C hita.
Skerið ýsuna í bita og raðið í eldfast mót.
Kryddið með salti og svörtum pipar.
Saxið grænmetið og setjið yfir fiskinn.
Hrærið saman sýrða rjómanum og smurostinum og hellið yfir fiskinn.
Myljið yfir nachosflögur.
Bakið við 180°C í 25 – 40 mínútur (fer eftir því hvort formið er stórt eða lítið).
Berið fram með því sem hugurinn girnist.