Matur | mbl | 28.2.2025 | 6:30 | Uppfært 8:06

Polpette frá Rómartímum uppáhaldsbollurnar hans Leifs

Leifur Kolbeinsson hjá La Primavera kann að gera bestu bollurnar, Polpette frá Rómatímum, bornar fram með spaghettí og heimagerðri tómatsósu. mbl.is/Árni Sæberg

Leif Kolbeinsson matreiðslumeistara hjá veitingastaðnum La Primavera þarf vart að kynna en hann hefur unnið hug og hjörtu landsmanna með ítalskri matargerð sinni.

Í tilefni þess að bolludagurinn er handa við hornið leitaði ég í smiðju hans og fékk hann til að gefa mér uppskrift að góðum ítölskum kjötbollum sem vert væri að laga á bolludaginn. Ég kom ekki að tómum kofanum hjá Leif og hann svipti hulunni af þessari dásamlegu uppskrift að Polpette – bollum sem er hreinn unaður að njóta með góðri tómatsósu og spaghettí eins og Ítalarnir kunna svo vel.

Ómótstæðilega girnilegur réttur, spaghettí með Polpette í tómatsósu að hætti Leifs. mbl.is/Árni Sæberg

„Polpette eða kjötbollur koma til Ítalíu frá Miðausturlöndum sem Kofta fyrr á öldum og hafa verið eldaðar í einhvers konar formi síðan á Rómartímum, misjafnt er hvaða kjöt er notað. Á Ítalíu í suðri er frekar verið að blanda saman nauta, kálfa- og svínakjöti, en í norðri er einungis notast við nautakjöt,“ segir Leifur.

Klassískur huggunarmatur

„Sagan segir að ítalskir innflytjendur í Bandaríkjunum hafa borið þær fram með pasta sem nú á dögum þykir klassískur huggunarmatur þegar vel heppnast. Hér notum við nauta- og svínakjöt í staðinn fyrir hvítt brauð í bollurnar, kryddum þær vel. Polpette í tómatsósu eru einnig frábærar með mjúkri polentu, gnocchi eða stöppuðum kartöflum,“ segir Leifur sem kann svo sannarlega að gleðja matarhjartað.

Undursamlega fallegur réttur sem freistandi er að njóta. mbl.is/Árni Sæberg

Spaghettí með Polpette í tómatsósu (kjötbollum)

Fyrir 4

Polpette

250 g nautahakk
250 g svínahakk
1 msk. brauðraspur
2 sneiðar hvítt brauð, bleytt í vatni og vatnið síðan kreist frá
1-2 rif hvítlaukur, fínt rifinn
1 tsk. óreganó, þurrkað
1 egg
3 msk. parmesan
1 tsk. fínt saxað ferskt rósmarin
Ögn þurrkaðar chiliflögur
1 msk. söxuð fersk steinselja
Salt og pipar eftir smekk
Tómatsósa, sjá uppskrift fyrir neðan

Aðferð:

Setjið kjöt og egg, rasp og allt krydd í skál og hnoðið vel saman.
Takið síðan l í bollur, þegar bollurnar eru mótaðar steikið þær vel á stórri pönnu.
Lagið síðan tómatsósuna.

Tómatsósa

2 dósir hakkaðir tómatar
1 skarlottulaukur, fínt saxaður
2-3 hvítlauksgeirar, fínt saxaðir
Jómfrúarolía eftir smekk
Salt og pipar eftir smekk
1 búnt basilíka, laufin tínd af stilkum og gróft rifin

Aðferð:

Setjið góðan pott á hellu og hitið með ólífuolíu.
Setjið skarlottulaukinn ofan í og steikið í skamma stund.
Bætið hvítlauknum við og steikið þar til laukurinn er eldaður.
Bætið þá tómötunum við og sjóðið í um það bil 10 mínútur og kryddið til með salti og pipar.
Bætið síðan sósunni á pönnuna með hakkbollunum, stráið basilíku yfir og setjið lok yfir.
Látið bollurnar sjóða í um það bil 10-15 mínútur, eftir stærð.