Matur | mbl | 6.3.2025 | 12:30

Ostalasanja sem allir ostaunnendur eiga eftir að dýrka

Bragðmikið og ljúffengt ostalasanja sem allir ostaunnendur eiga eftir að dýrka. Ljósmynd/Aðsend

Þú verður ekki fyrir vonbrigðum með þessa matarveislu ef þú elskar osta. Þetta er ostaútgáfa af sælkeralasanja þar sem nokkrir bragðmiklir ostar leiða saman krafta sína með dásamlegri útkomu. Hreint út sagt frábær fjölskylduréttur með nóg af ostum og öðru góðgæti sem er fullkomið að njóta á fimmtudagskvöldi. Uppskriftin kemur úr smiðju uppskriftavefsins Gott í matinn.

Ostalasanja

500 g nautahakk
1 stk. laukur, saxaður
4 stk. hvítlauksgeirar, pressaðir
2 dósirhakkaðir tómatar
2 msk. tómatpúrra
2 tsk. þurrkað óreganó
2 tsk. þurrkuð basilika
2 tsk. ítalskt pastakrydd
salt og pipar eftir smekk
ein klípa íslenskt smjör
rjómaostur til matargerðar
rifinn gratínostur
raspaður Feykir
Piparostur

Aðferð:

Bræðið smjörið á pönnu og steikið laukinn og hvítlaukinn þangað til að hann er aðeins búinn að taka sig.
Takið af pönnunni og skiljið frá smjörinu.
Þurrsteikið hakkið og kryddið með óreganó, basilíku, ítalska kryddinu, salti og pipar.
Bætið lauknum út í og því næst tómatpúrrunni og hökkuðu tómötunum.
Látið malla þangað til hakkið er alveg orðið eldað.
Smakkið til og bætið við óreganó eða öðru kryddi eftir smekk.

Samsetning:

Byrjið á að setja hakksósuna í botninn á eldföstu formi.
Leggið lasagnaplötur yfir og smyrjið þær með rjómaosti eða slumpið yfir plöturnar. Endurtakið þetta en passið að eiga hakk fyrir efsta lagið.
Dreifið rifnum gratínosti yfir í lokin.
Gott er að raspa Feyki eða rifinn piparost fyrir þau sem vilja fá sterkara bragð.
Bakið í ofni við 180°C hita í um það bil 45 mínútur.
Ef þið getið stillt ykkur og beðið í um 10 mínútur eftir að þetta er tekið úr ofninum þá er mun auðveldara að skera í hæfilega skammta.