Boðið verður upp á safaríka og djarfa smakkbita

Vetrarmatarmarkaður Íslands verður haldinn helgina 8. - 9. mars á jarðhæð í Hörpu, þar sem íslenskar matarhetjur koma saman til að fagna gæðum og fjölbreytni matvæla. Viðburðurinn verður opinn frá klukkan 11:00 til 17:00 báða daga og er aðgangur ókeypis.

Markaðurinn leggur áherslu á upplifun, uppruna og umhyggju, en það eru einkunnarorð Matarmarkaðar Íslands.

Sæt og seigt góðgæti

„Þar gefst gestum tækifæri til að kynnast beint þeim sem standa á bak við matvælaframleiðslu, allt frá smábændum til stórra matvælafyrirtækja. Þeir munu kynna og selja afurðir sínar, sem spanna allt frá sætu og seigu góðgæti yfir í safaríka og djarfa smakkbita,“ segir Eirný Sigurðardóttir, einn aðstandenda matarmarkaðarins.

Allir eru velkomnir á markaðinn og skipuleggjendur hvetja sérstaklega foreldra til að taka börnin með, enda er markmiðið að kynna næstu kynslóð neytenda fyrir einstökum hráefnum og matarhefðum Íslands.

• Blogga um frétt