Bolludagurinn er nýafstaðinn en hann er einn uppáhaldsdagurinn hennar á almanakinu og daginn kallar Elenora þjóðhátíðardag bakara. Í tilefni bolludagsins bauð hún upp á Bollu pop-up á sunnudaginn síðastliðinn í Höfuðstöðinni sem er í gömlu kartöflugeymslunum í Ártúnsbrekkunni við Elliðaárdalinn.

Það er gaman að segja frá því að bollurnar seldust upp á mettíma.

„Við opnuðum dyrnar klukkan tólf í hádeginu og þær voru uppseldar rúmri klukkustund síðar. Ég var orðlaus að sjá móttökurnar og viðbrögðin hjá viðskiptavinum mínum. Þetta var rosalegt í fyrra og enn magnaðara í ár,“ segir Elenora meyr.

Kom til að halda upp á bolludaginn

Elenora kom sérstaklega til landsins til að halda hátíðalega upp á bolludaginn og standa fyrir pop-up-inu en hún býr í London og starfar þar í bakaríi.

„Ég kom til landsins til að gleðja bolluaðdáendur með bolluviðburði en ég gerði 4 tegundir. Það fór gríðarlega mikil hugmyndavinna í hverja einustu bollu og nánasta fólkið mitt var eflaust orðið ansi þreytt á mér eftir endalaus skilaboð fram og til baka um bollutegundir,“ segir Elenora og skellihlær.

„Upphaflega var ég að velja á milli 18 tegunda, sem urðu svo næstum 30 tegundir og í lokin voru það tvær bollur sem allir voru sammála um að væru langbestar. Ég ákvað síðan hvaða aðrar tvær pössuðu best inn í flóruna.

Bollurnar og hugmyndirnar að baki þeim eiga sér alla sögu. Það er mikil ást á bak við hverja bollu og það var gaman að sjá hvernig fólkið í lífi mínu, bakaríin sem ég hef unnið í og annað skemmtilegt hefur gefið mér innblástur í uppskriftirnar og baksturinn.“

Bollurnar sem Elenora bauð upp á í ár

• Eplapæ í sparifötum: Karamelliseruð epli, hafra-crumble, pistasíu-praline, sítrónu-curd og vanillu chantilly-rjómi.
• Hindberja og Biscoff-ostakökubolla: Hindberja-coulis, biscoff crumble, biscoff ganache og mascarpone-ostakökurjómi.
• Sælkerinn: Salthnetu-praline, saltkaramella, ristaðar salthnetur og þeyttur súkkulaði-ganache-rjómi.
• Íslendingurinn: Rabarbarasulta, jarðarberja-compote, kardimommu-infused crème pat, vanillurjómi og súkkulaðitoppur.

„Ómissandi fyrir mig sem bakara“

Þetta er í annað sinn sem Elenora stendur fyrir bolluviðburði sem þessum en í fyrra var hún með pop-up á nýja kaffihúsinu hjá Kokku við Laugaveginn og þá gerðist hið sama. Bollurnar seldust upp á augabragði.

„Það er ómissandi fyrir mig sem bakara að vera á Íslandi á þjóðhátíðardegi stéttarinnar. Ég var staðráðin í að gera þetta aftur í ár og byrjaði að undirbúa viðburðinn í vetur því ég gat hreinlega ekki beðið lengur með að byrja. Þetta gekk svo vel í fyrra að ég á enn erfitt með að trúa því. Ég átti ekki einu sinni von á að það kæmu fleiri en aðeins fjölskylda og vinir.

Ég fékk algjört sjokk þegar við opnuðum dyrnar í fyrra hjá Kokku og sá að það var röð niður stigann og lengst út á götu. Örstuttu seinna voru mörg hundruð bollur uppseldar. Ég trúði ekki mínum eigin augum, stuðningurinn fór langt fram úr mínum stærstu draumum og það var lítil bakarakona inni í mér sem fylltist miklu þakklæti. Svo endurtók þetta sig á sunnudaginn, ég er bara í sjokki.“

Nýtt met slegið

Fólk byrjaði að streyma að Höfuðstöðinni um klukkan tíu um morguninn þrátt fyrir óveður og Elenora var búin þrefalda magnið frá því í fyrra. Nýtt met var slegið enn og aftur, allt var uppselt á rúmri klukkustund.

„Fjölskyldan mín sem ætlaði bara að sitja og njóta þess að fá sér bollur endaði með að vera dregin í afgreiðslu og meira að segja níu ára litla frænka mín var komin í að raða í poka og hjálpa til. Vísa þurfti tugum fólks frá vegna þess hve hratt við seldum upp, sem er alltaf leiðinlegt,“ segir Elenora sem er á bleiku skýi eftir viðtökurnar.