Matargyðjan knáa, Arabella Morgan, og kokkurinn, Davíð Örn Hákonarson, yfirkokkur á Skreið, blésu til magnaðrar veislu síðustu helgi með viðburði í seríunni The Underground Supper Club þar sem matargerðarlist, myndlist og tónlist mættust á einstakan hátt.

Listakonan Ásdís Sif Gunnarsdóttir var með gjörning og tónlistarkonan Jara skapaði heillandi hljóðheim meðan gestir gæddu sér á gómsætum réttum innblásnum af Miðjarðarhafinu og Mið-Austurlöndum.

Um þrjátíu matarunnendur sóttu viðburðinn sem var haldinn í glæsilegu rými herrafataverslunarinnar Thomsen Rvk sem opnaði fyrir jól og selur vönduð föt úr smiðju fatahönnuðarins Gunnars Hilmarssonar.

Breyttist í sannkallað ævintýraland

Rýmið umbreyttist í sannkallað ævintýraland og gestir snæddu á langborði við kertaljós.Viðburðurinn var studdur af Íslenskri hollustu sem lagði til sjávartrufflu sem var notuð með dásamlegum ceviche-rétti, af Santé wines sem buðu upp á Drappier-kampavín sem var kælt með gullfallegum klakastandi frá Klakavinnslunni og Vaxa bauð upp á fagurt salat.

Ostaréttur var framreiddur á undan eftirréttinum að frönskum sið og það var engin önnur en ostadrottningin Eirný Sigurðardóttir sem kom með þrjá framandi osta og útfærði.

Hægt er að fylgjast með næstu staðsetningum The Underground Supper Club á Instagram-síðunum @theundergroundsupperclub og @bellamorgan en Arabella tekur einnig að sér matargerð fyrir einkaviðburði.

Sjáið myndirnar hér fyrir neðan en þær fanga dulúðina sem var í loftinu á þessu kvöldi: