Matur | Morgunblaðið | 16.3.2025 | 12:30

Pavlova með ástaraldin

Ástríðupavlovan hennar Tinnu Sædísar Ægisdóttur er guðdómlega falleg og ávextirnir gera hana sumarlega í ásýnd. mbl.is/Hákon Pálsson

Tinna Sædís Ægisdóttir bakaranemi töfrar fram pavlovu sem ætti að slá í gegn í hvaða veislu sem er. Hún myndi bjóða upp á þessa köku ef hún væri að fermast í dag. Tinna hefur mikið dálæti á bakstri og bakaði þessa gullfallegu fermingartertu, sem hún nefndi Ástríðupavlovuna.

„Ég hef starfað sem bakari í rúm fjögur ár, en það má að mörgu leyti segja að ég hafi byrjað mun fyrr í eldhúsi foreldra minna en þar bakaði ég mjög mikið af afmælistertum fyrir fjöldskyldumeðlimi. Fyrir fermingarnar sem fram undan eru þá langar mig að gera fermingartertu sem skín á borðinu sem „aðaltertan“ eða jafnvel samhliða öðrum kræsingum,“ segir Tinna og brosir sínu geislandi brosi.

Tinna Sædís Ægisdóttir hefur mikið dálæti á bakstri og bakaði þessa gullfallegu fermingartertu, sem hún nefndi Ástríðupavlovuna. mbl.is/Hákon

Fékk innblásturinn úr Stóru Disney köku- og brauðbókinni

„Áhugi minn á bakstri kom snemma í ljós og ég man vel eftir að hafa óskað mér alls kyns matreiðslubóka í gjöf. Ég bakaði mikið upp úr Stóru Disney köku- og brauðbókinni. Þar fann ég mikinn innblástur fyrir minn eigin bakstur fyrir fjöldskylduviðburði. Í dag er ég duglegri að nota mitt eigið hugmyndaflug þegar kemur að bragði og eigin reynslu í starfi, þó að ég kíki að sjálfsögðu af og til í matreiðslubækur.“

Aðspurð segist Tinna muna mjög vel eftir fermingarveislunni sinni. „Fermingin mín var ekki beint með hefðbundnum hætti, ég átti heima í Noregi á þeim tíma og hafði þá val á milli þess að fermast með íslensku eða norsku krökkunum sem fermast ári seinna en við. Ég valdi að fermast með íslensku krökkunum og hélt veislu í Grasagarðinum og var ótrúlega heppin með veður. Veitingarnar voru af ýmsu tagi og voru settar upp sem hlaðborð.

Það var engin sígild fermingarkaka á hlaðborðinu heldur voru veitingar í munnbitastærðum, snittur, brownie, pavlovur, bollakökur og fleira. Allt var þetta mjög fallega borið fram og skreytt með sumarlegum hætti eins og ætum blómum og ferskum berjum.“

Mikill aðdáandi ástaraldins

Tinnu myndi þó langa til að vera með fermingartertu í dag ef hún væri að stilla upp veisluborði. Draumafermingartertan í dag væri pavlova en hún er í uppáhaldi. Hún er ólík klassískum marens af því að hún hefur mjúka miðju. Pavlova býður einnig upp á fjölmarga möguleika varðandi fyllingu og rjóma.

Ég er einnig mikill aðdáandi ástaraldinávaxtarins sem er súr og hefur ákveðinn ferskleika sem kemur fullkomnu jafnvægi á pavlovu. Draumafermingartertan mín væri þar af leiðandi pavlova með ástaraldin-„coulis“, sem er í raun sósa og vanillurjómi. Allir þættirnir vinna vel saman og verða algjör veisla í munni. Að lokum myndi ég skreyta með ferskum berjum og meira af ástaraldinávextinum,“ segir Tinna.

Ástríðuávöxtur er suðrænn ávöxtur sem er þekktur fyrir einstakt bragð, litríkan og líflegan lit þegar hann er opnaður. Hann passar vel með sætu eins og marens. mbl.is/Hákon

Pavlova með ástaraldinsósu

Pavlovubotn

200 g eggjahvítur í stofuhita
¾ tsk. Cream of tartar
300 g sykur
3 tsk. maizena-mjöl

Aðferð:

Byrjið á því að stilla ofninn á 100°C hita.
Setjið eggjahvítur og Cream of tartar í hrærivélarskál og þeytið á miðlungshraða.
Blandið sykrinum og maizena-mjöli saman í aðra skál.
Þegar froða hefur myndast á eggjahvítunum megið þið byrja að bæta sykurblöndunni við, nokkrum matskeiðum í senn.
Þegar öll sykurblandan er komin út í látið þá marensinn þeytast í 4-5 mínútur í viðbót eða þar til marensinn er orðinn stífur.
Teiknið hring á bökunarpappírinn sem er u.þ.b. 5 cm minni en kökudiskurinn sem þið áætlið fyrir notkun.
Fyllið sprautupoka með hringlóttum stút sem hefur gat á með marens.
Sprautið hring af marens meðfram línunni sem þið teiknuðuð á bökunarpappírinn.
Þar næst sprautið doppur sem þið dragið í átt að miðju hringsins og reynið að mynda ágæta hæð, um 3 cm. Í raun er hægt að gera kökuna í því formi sem ykkur langar, til að mynda bókstaf eða tölustaf svo fátt eitt sé nefnt.
Setjið síðan inn í ofn og bakið í 100-120 mínútur. Kælið marensinn í ofninum í a.m.k. 2 klukkustundir.

Ástaraldinsósa

8 stk. ástaraldin
2 msk. sykur

Aðferð:

Skerið ástaraldin til helminga og skafið innihaldið úr með skeið og ofan í pott.
Bætið sykrinum við og hrærið vel saman.
Sjóðið á lágum hita í 10 mínútur.
Kælið vel, það mun þykkja sósuna.

Vanillurjómi

500 ml rjómi
1 tsk. vanillusykur eða vanillu-paste
2 msk. flórsykur

Aðferð:

Þeytið rjómann á miðlungshraða ásamt vanillunni og flórsykrinum þar til hann er orðinn stífþeyttur.

Skraut

Fersk ber að eigin vali
Ástaraldin (valfrjálst)
Áður en þið skreytið tertuna með berjum er vert að skola berin vel og þurrka.

Samsetning

Komið pavlovubotninum fyrir á kökudisknum sem þið ætlið að bera tertuna fram á með örlítið af rjóma undir til að forðast að hann renni af.
Setjið ástaraldinsósuna í sprautupoka og sprautið þykkri línu í miðju hringsins.
Setjið rjómann í sprautupoka og notið sama sprautustút og við gerð marensins.
Sprautið rjómanum með sama hætti og þið gerðuð við marensinn, í hring og síðan doppur sem þið dragið inn að miðju.
Skreytið að lokum með ferskum berjum og því sem ykkur langar.
Hver og einn getur gert kökuna að sinni.