Matur | mbl | 16.3.2025 | 18:00

Steiktur lax og chimichurri í boði Gabríels

Gabríel Kristinn Bjarnason býður upp á lax með chimichurri og ljúffengu meðlæti. Samsett mynd

Gabríel Kristinn Bjarnason landsliðskokkur og matreiðslumaður gaf út matreiðslubókina, Þetta verður veisla!, á síðasta ári sem hefur heldur betur slegið í gegn. Í bókinni er meðal annars að finna þessa uppskrift að girnilegum lax sem borinn er fram með brokkólí, blaðlauk, stökku rósakáli og chimichurri-sósu.

Frétt af mbl.is

Boðið til veislu!

Þetta er hinn fullkomni réttur þegar matreiða þarf í flýti fyrir hvaða tilefni sem er, forrétt, aðalrétt eða bara kvöldmat til að koma fiski inn í rútínuna.  Steikt laxaroð og chimichurri er blanda sem steinliggur.

Bókin er stútfull af einföldum eðalréttum sem eiga vel heima í veislum eða í næsta matarboði.

Steikt laxaroð og chimichurri steinliggur saman. Ljósmynd/Hákon Björnsson

Lax með brokkólí, blaðlauk, stökku rósakáli og chimichurri

Fyrir 4–5

Lax

4 stk. laxbitar með roði (4x150 g)
3 msk. repjuolía
2 msk. smjör
Salt eftir smekk

Aðferð:

Leggið laxinn niður þannig að hliðin með roðinu snúi upp.
Skerið næst þrjár línur í roðið svo það steikist betur.
Hitið pönnu áháanm hita og bætið við repjuolíu á pönnuna.
Þegar farið er að rjúka af pönnunni leggið þá laxinn á pönnuna og látið roðið snúa niður. Steikið laxinn vel án þess að hreyfa við honum í um það bil 3-5 mínútur, fer eftir hversu háum hita þið náið upp.
Snúið síðan laxinum við, hellið smjöri yfir hann með skeið og steikið í um það bil  3-5 mínútur.
Slökkvið síðan undir pönnunni og látið laxinn liggja á pönnunni í smá tíma.

Bakað brokkolí, blaðlaukur og rósakál

1 stk. brokkólí ca. magn, eins og rósakálið
1 stk. blaðlaukur
100 g rósakál
3 msk. ólífuolía
200 g rauðvínsedik
100 g sykur
Salt og pipar eftir smekk

Aðferð:

Byrjið á því að hita ofninn í 200°C.
Takið brokkólíið, fjarlægið stilkinn og skerið það í bita.
Takið til ofnplötu klædda í bökunarpappír og setjið brokkólíbitana á.
Skerið blaðlaukinn í helming og fjarlægið græna hlutann.
Skolið síðan laukinn í köldu vatni til að ná sandinum úr.
Skolið rósakálið og skerið í toppinn svo það opnist fallega í ofninum.
Raðið blaðlauknum og rósakálinu á bökunarplötuna með brokkólíinu.
Kryddið allt hráefnið með ólífuolíu, salti og pipar eftir smekk og passið að hafa gott bil á milli grænmetisins svo það fái jafna steikingu.
Setjið inn í ofn og bakið í 15-30 mínútur, getur verið misjafnt eftir ofnum hversu langan steikingartíma þarf.
Setjið edik og sykur í pott á meðan grænmetið bakast í ofninum og sjóðið niður í helming eða þar til blandan er orðin að þykkum gljáa. Bætið þá við ólífuolíu svo til verði vinagretta.
Takið grænmetið úr ofninum þegar það er tilbúið og hellið vinagrettunni yfir.

Chimichurri

50 g hvítur laukur
50 g hvítlaukur
20 g ferskt kóríander
100 g fersk steinselja
1 tsk. chili-flögur
10 g ferskt jalapeno eða chili
20 g hvítvínsedik
250 g ólífuolía
Salt og pipar eftir smekk

Aðferð:

Byrjið á því að hreinsa ferskt chili/jalapeno með því að skera það í tvennt, skafa fræin úr og skera endana af.
Setjið síðan allt hráefnið í matvinnsluvél og hrærið vel saman þangað til það er vel maukað, kryddið til með salti og pipar eftir smekk.