Eftirrétturinn sem matargestirnir tóku andköf yfir
Setja bókamerki
Eftirréttadrottningin Ólöf Ólafsdóttir töfraði matargestina sem heimsóttu Finnsson á Food and Fun matarhátíðinni sem haldin var með glæsibrag í marsmánuði með undursamlega góðum eftirrétt, Key lime pie.
„Þetta er ekki hinn hefðbundni „Key lime pie“ en ég gerði réttinn eins og mér finnst vera besta útgáfan af honum. Tilurð þess að rétturinn var til er sú að Óskar á Finnsson í Kringlunni, heyrði í mér og bað mig um að vera með í Food and Fun gleðinni þeirra og gera mitt tvist á eftirréttinn fyrir gestakokkinn, Tom Cook. Hann vildi bjóða upp á þennan eftirrétt en þetta er amerískur eftirréttur,“ segir Ólöf þegar hún er spurð hvernig uppskriftin varð til. Ólöf segir að þetta hafi verið afar skemmtilegt og gaman að fá tækifæri til að spreyta sig með þessum hætti.
Hefur brunnið fyrir eftirréttagerð
„Ég hef brunnið fyrir eftirréttagerð síðastliðin 10 ár og gert mikið af skemmtilegum hlutum þegar eftirréttagerð er annars vegar,“ bætir Ólöf við. En hún hefur einnig verið í íslenska kokkalandsliðinu og vann til að mynda silfurverðlaun með liðinu á síðasta ári á Ólympíuleikunum í matreiðslu.
Ólöf segist yfirleitt halda upp á páskana hátíðlega með fjölskyldu sinni og ákveðnar hefðir séu í forgrunni en í ár verði þetta aðeins öðruvísi.
„Páskahefðin mín verður ávallt lamb í kvöldmatinn á páskadag. Ég kem til með að eiga öðruvísi páska í ár en förinni er heitið til Danmerkur þar sem ég er að fara á opnunina í Skern og ætla að veiða mest alla páskana, þannig því miður missi ég af páskalambinu í ár.“
Hún gefur hér lesendum matarvefs mbl.is leyndardómsfullu uppskriftina að réttinum sem á vel heima í komandi páskaboðum og gæti til að mynda verið hinn fullkomni eftirréttur til að bjóða upp á á sumardaginn fyrsta sem nálgast óðfluga. Sumardagurinn fyrsti ber upp fimmtudaginn 24. apríl næstkomandi svo það er smá tími til stefnu til að æfa sig.
Eftirrétturinn sem matargestirnir tóku andköf yfir
Keylime pie a la Ólöf
Tart-botn
- 160 g hveiti
- 5 g kakó
- 94 g smjör
- 55 g flórsykur
- 75 g eggjarauður
- 1 tsk. salt
Aðferð:
- Setjið allt hráefnið saman í matvinnsluvél og vinnið gróflega saman.
- Setjið deigið á borðið og hnoðið það saman í kúlu, plastið kúluna og setjið hana inn í kæli í 1 klukkustund.
- Takið deigið úr kælinum og leyfið því að hvíla á borðinu í 5 mínútur svo auðveldara sé að rúlla því út.
- Smyrjið 20 cm tart-form með olíu, rúllið deiginu út í 25–30 cm hring og leggið í formið.
- Þegar deigið er sett í formið þarf að ýta því vel út í alla kanta.
- Stingið með göt með gaffli í botninn til að koma í veg fyrir loftbólur.
- Bakið botninn í 175°Cheitum ofni í um það bil 15–20 mínútur.
Lime curd – Límónusmjör
- 100 g límónur
- 137 g sykur
- 80 g egg
- 25 g eggjarauður
- 145 g smjör við stofuhita
- 1,25 g gelatín
- 1 stk. sítrónubörkur
- ½ vanillustöng
Aðferð:
- Setjið öll hráefnin í pott fyrir utan smjörið og eldið þau upp í 8°CC, sigtið blönduna, bætið matarlíminu saman við og leyfið henni að kólna niður í 40°C hita.
- Þegar blandan hefur náð réttu hitastigi er smjörinu blandað saman við með töfrasprota og að lokum er sítrónu/límónusmjörið sett inn í kæli til að taka sig.
Ítalskur marens
- 300 g sykur
- 150 g hvítur
- 75 g vatn
Aðferð:
- Sjóðið sykur og vatn upp í 118°C hita. Þetta verður að sykursírópi.
- Á meðan þetta er að sjóða, þeytið þá eggjahvíturnar létt.
- Hellið svo sykursírópinu út í eggjahvítublönduna og þeytið þar til marensinn er tilbúinn.
- Fyllið tart-skeljarnar með lime curdinu, sprautið ítalska marengsum yfir og brennið hann létt með brennara.
- Skreytið að vild.
- Ólöf ber tartið fram með kókosís.
/frimg/1/56/8/1560833.jpg)
Segir ósanngjarnt að meta nemendur út frá einkunnum
Birgitta vinsælust
Janus bjargaði lífi Írisar
Slysið á Siglufjarðarvegi: Fjórir drengir á gjörgæslu
/frimg/1/56/3/1560374.jpg)
Jarðskjálftahrina nærri Húsavík
Byggð í Geldinganesi oft til umræðu
Sögðu þingmennirnir satt í pallborðinu?