Matur | mbl | 7.4.2025 | 6:30

„Hjálpar mikið að vera með skipulagðan vikumatseðil“

Jóhanna Ýr Hallgrímsdóttir býður upp á vikumatseðilinn að þessu sinni. Hér er hún ásamt dóttur sinni Hugrúnu Lind Finnbogadóttur á góðri stundu. Ljósmynd/Aðsend

Jóhanna Ýr Hallgrímsdóttir býður upp á vikumatseðilinn að þessu sinni. Hún er mikil fjölskyldumanneskja og matur spilar stóra rútínu á heimilinu.

Jóhanna er 35 ára gömul, trúlofuð fjögurra barna móðir í Árbænum og segir að það sé að mörgu að hyggja á heimilinu.

„Ég á tvö börn með unnusta mínum, Finnboga Ágústssyni, Hugrúnu Lind 6 ára og Hallgrím sem verður þriggja ára í haust. Þegar ég kynntist Finnboga eignaðist ég tvær stjúpdætur sem koma til okkar aðra hverja helgi, Guðrúnu Lilju 14 ára og Sædísi Önnu 13 ára. Ég starfa sem markaðsstjóri hjá heildsölunni Innnes og Finnbogi starfar hjá Marel í þjónustu og viðhaldi á búnaðinum hjá þeim.

Jóhanna ásamt manni sínum Finnboga Ágústssyni. Það deila saman áhuga sínum á. mat og eru iðin að senda hvort öðru spennandi uppskriftir. Ljósmynd/Aðsend

Einstaklega gaman að elda á pabbahelgum

Þannig má því segja að það sé nóg að gera í vinnunni og fjölskyldulífi. Það er einstaklega gaman að elda á pabbahelgum og eru nokkrir réttir sem ég geri í uppáhaldi hjá þeim elstu. Þau yngri eru minna að spá í hvað er í matinn og Hugrún Lind er með mjög einfaldan matarsmekk,“ segir Jóhanna og brosir.

Jóhanna ásamt tveimur yngri börnunum þeirra, Hugrúnu Lind og Hallgrími. Ljósmynd/Aðsend

„Ég elska að skipuleggja vikuna og það hjálpar mikið að vera með skipulagðan vikumatseðil. Í vinnunni minni set ég saman vikumatseðil fyrir uppskriftasíðuna Gerum daginn girnilegan ásamt því að sinna samfélagsmiðlunum tengt því. Það má því segja að ég sé að skoða og pæla í uppskriftum daglega,“ segir Jóhanna enn fremur og hlær.

„Oftast sé ég um eldamennskuna en Finnbogi er samt sem áður listakokkur og elskar að dunda sér í eldhúsinu. Hann er með grænar fingur og á sumrin fer hann reglulega í matjurtagarðinn og nær í grænmeti sem hann er að rækta. Við deilum áhuga á eldamennsku og okkur finnst gaman að senda á milli spennandi uppskriftir, ég heillast mest af einföldum og fljótlegum réttum en Finnbogi elskar að hægelda mat og gera sósur og maríneringar frá grunni.“

Raðar í hillur í búðarferðinni

Matur er stór partur af lífi Jóhönnu alla daga og það má stundum segja að hún sé alltaf í vinnunni. Sem betur fer hefur hún áhuga á mat og nýtur þess að vera í kringum hann.

Mægðurnar saman á góðri stundu. Ljósmynd/Aðsend

„Þar sem að ég starfa í kringum matvæli alla daga verður þetta hálfgert áhugamál, það er að segja að skoða uppskriftir, vörur og pæla í vörumerkjum. Það sem ég hef lært á þessu er að vanda valið á hráefnum, það er ekki alveg sama hvað maður notar hverju sinni. Börnunum finnst ekkert skemmtilegt að fara með mér í matvöruverslun þar sem ég enda oft á að vera að taka myndir, raða aðeins í hillur og svona,“ segir Jóhanna kímin.

Hér má sjá vikumatseðilinn sem Jóhanna er búin að setja saman fyrir vikuna.

Mánudagur – Djúsí samloka

„Ég viðurkenni að á mánudögum er ég oft löt við að elda og elska ef við eigum afganga frá deginum áður. Við reynum oft að elda eitthvað extra gott á sunnudögum. Þessi samloka steinliggur hún er ótrúlega saðsöm og í henni er hamborgarasósa, skinka, salat, tómatar, jalapenó ásamt cheddar- og havarti-osti.“