Matur | mbl | 12.4.2025 | 6:30 | Uppfært 7:35

Sigurgeir bakar brauð á hverjum laugardagsmorgni

Sigurgeir Jónsson Vestmannaeyingur bakar brauð á hverjum einasta laugardagsmorgni. Ljósmynd/Aðsend

Vestmannaeyingurinn Sigurgeir Jónsson er iðinn við baksturinn þrátt fyrir háan aldur, en hann er 83 ára gamall og bakar á hverjum laugardegi. Hann gerðist svo frægur að baka alvöru bjórköku fyrir eiginkonu sína á afmælisdegi hennar, Guinness-köku, sem er í miklu uppáhaldi hjá fjölskyldunni.

Hann gefur lesendum matarvefsins uppskriftina að þessu dýrðlega brauði, sem ber heitið Lífsins brauð en nýlega afhjúpaði hann uppskriftina að Guinness-kökunni frægu.

„Nafnið frá mér komið“

„Það er bakað á hverjum laugardegi og systir mín fær helminginn af því. Hún launar svo fyrir sig á þriðjudögum og fimmtudögum með súrdeigsbrauði. Það er ekki oft farið í bakarí á þessum heimilum. Nafnið á brauðinu er frá mér komið, ég man ekki hvað það hét upphaflega en ég gaf því nafnið Lífsins brauð,“ segir Sigurgeir og brosir.

„Ekki man ég hvar ég fékk þessa uppskrift, síðan eru líklega tveir áratugir og hún er búin að taka talsverðum breytingum síðan, til dæmis var ekkert korn í henni ef ég man rétt. Sólblómafræjum var aðeins stráð ofan á brauðið. En þetta brauð er ofarlega á vinsældalistanum hjá minni fjölskyldu og reyndar fleirum,“ bætir Sigurgeir.

Þetta dásamlega brauð er tilvalið að baka um páskana og bjóða til brauðveislu. En páskarnir nálgast óðfluga og skírdagur verður næstkomandi fimmtudag, þann 17. apríl, sem er tilvalinn til baksturs og nosturs í eldhúsinu.

Þriggjakornabrauðið hans Sigurgeirs nýtur mikilla vinsælda. Ljósmynd/Aðsend

Sigurgeir bakar brauð á hverjum laugardagsmorgni

Lífsins brauð

3 dl volgt vatn
1 msk. sykur
1 msk. olía
1,5 msk. þurrger (eitt bréf)

Næsta skref

280 g hveiti
170 g heilhveiti
½ tsk. lyftiduft
1 tsk. salt
¼ bolli graskersfræ
¼ bolli sólblómafræ
¼ bolli sesamfræ
¼ bolli hörfræ
3-4 tsk. heilt kúmen

Næsta skref

2 msk. sólblómafræ
2-3 örþunnar smjörklípur
1-2 msk. gróft salt
1 msk. volgt vatn

Aðferð:

Hrærið saman í skál vatni, sykri, olíu og þurrgeri.
Látið standa í 10 mínútur.
Blandið saman hveiti, heilhveiti, lyftidufti, salti, graskersfræi, sólblómafræi, sesamfræi, hörfræi, lyftidufti og kúmeni.
Hellið síðan þessari blöndu saman við gerblönduna og hnoðið, þægilegt er að gera það í hrærivél með hnoðara.
Mótið aflangan hleif úr deiginu.
Hæfilegt er ef deigið aðeins loðir við fingurna, bætið vatni eða hveiti við til að fá deigið í hæfilega þykkt.
Setjið á ofnplötu með bökunarpappír, skerið þunnar raufar skáhallt yfir hleifinn og penslið með 1 msk. af volgu vatni, stráið sólblómafræjum, smjöri og salti yfir og bakið við 210° C á blástri í 28 mínútur.
Látið kólna í 10 til 15 mínútur áður en það er skorið.
Í þetta má bæta ýmsu fleira góðgæti, til að mynda bætir Sigurgeir oft við 1/3 bolla af möndluflögum eða möndlukurli ef til er í eldhúsinu og eflaust gæti fleira gert þetta góða brauð enn betra.