Stór­feng­leg­ar ferm­ing­ar­veisl­ur skarta sínu feg­ursta víða um land allt þessa dag­ana og hver og einn er með sinn stíl og per­sónu­lega áferð á veisl­unni sem lýs­ir gjarn­an ferm­ing­ar­barn­inu í hnot­skurn.

Und­ir­rituð rak aug­un í und­ur­fallegt ferm­ing­ar­borð á sam­fé­lags­miðlum á dög­un­um og fékk aðstand­end­ur veisl­unn­ar til að segja aðeins frá til­urð þess og sam­setn­ingu.

Móðir ferm­ing­ar­barns­ins, Anna Mar­grét Björns­son, er svo hepp­in að eiga dá­sam­leg­ar vin­kon­ur sem eru al­gjör­ir mat­arsnill­ing­ar, þær Áslaugu Snorra­dótt­ur mat­arlista­konu og ljós­mynd­ara með meiru og Eir­nýju Sig­urðardótt­ur osta­drottn­ingu Íslands sem færðu töfra sína inn í bjart­an lít­inn sal á Há­teigs­vegi þar sem nán­ustu ætt­ingj­ar komu sam­an til að fagna með ferm­ing­ar­barn­inu.

Heitt í ofni fyr­ir af­ana

Ferm­ing­ar­stúlk­an var með nokkr­ar hug­mynd­ir sem voru svo út­færðar, hún vildi hafa mikið af gyllt­um og hvít­um blöðrum, hún vildi bjóða upp á sashimi sem er í miklu upp­á­haldi, heitt í ofni fyr­ir af­ana og svo eitt­hvað pínu franskt þar sem móður­fjöl­skylda henn­ar teng­ist Frakklandi sterk­um bönd­um.

Síðan vildi hún hafa „DIY“ photo­booth og „DIY“ mynda­vegg þar sem hún er mjög list­ræn og sniðug. Hún og pabbi henn­ar út­færðu hvort tveggja með glæsi­brag.

Stjúppabbi henn­ar tók sig til og bakaði heita brauðrétti fyr­ir heila her­sveit, syst­ir henn­ar bakaði pavlov­ur og amma bakaði fransk­ar súkkulaðikök­ur, þannig þetta var mjög heim­il­is­legt og heiðarlegt.

Skreyt­ing­ar­drottn­ing­in og osta­drottn­ing­in sam­einuðu krafta sína

Töfr­arn­ir í veisl­unni áttu sér svo stað þegar Áslaug og Eir­ný mættu á svæðið eft­ir at­höfn­ina og breyttu saln­um í fal­lega gleðisprengju.

Eir­ný sauð kara­mellu og límdi sam­an turn úr litl­um vatns­deigs­boll­um og kara­melluþráðum en þessi kaka kall­ast „Croque-en-bouche” á frönsku og er bor­in fram við ferm­ing­ar og brúðkaup í Frakklandi. Gest­irn­ir eiga þá hver um sig að brjóta boll­urn­ar af turn­in­um.

Áslaug bjó til fag­ur­bleika Ri­bena-bollu með myntu og sítr­ónu, sem var vin­sæl hjá full­orðnum sem og börn­um, og raðaði kleinu­hringj­um í turna á borðinu og gerði fjall af jarðarberj­um til að dýfa í súkkulaði.

Hún gerði einnig sashimi úr Vest­fjarðableikju sem var borið fram með engi­fer, dai­kon og wasa­bi sem sló í gegn.

Áslaug fór ham­förum og skreytti allt sem hægt var að skreyta með rós­um í bleik­um og rauðum tón­um. Eir­ný bauð svo upp á geggjaðan gorgonzola í peru­skógi með döðlum og dökku súkkulaði og einnig var ör­lítið franskt crem­ant á boðstól­um til að skála fyr­ir ferm­ing­ar­stúlk­unni. Minnstu gest­irn­ir í veisl­unni fengu svo að lita mynd af ferm­ing­ar­stúlk­unni í Studio Ghi­bli-stíl á sér borði með djús og kexi.

Þemað í veisl­unni var að hafa þetta lítið og heim­il­is­legt en um­fram allt fal­legt og skemmti­legt þar sem áhersla var á að gleðja augað og gesti.

Brak­ar í munni

Fyr­ir áhuga­sama, sér í lagi þá sem elska fransk­ar sæl­kerakræs­ing­ar þá er Croque-en-bouche, sem stund­um er kallað croqu­em­bouche eða brak­ar í munni. Það er vegna stökku kara­mell­unn­ar í kök­unni. Kökut­urn­inn úr vatns­deigs­boll­un­um var senni­lega fund­inn upp af Ant­on­in Carrême sem setti upp­skrift­ina í frönsku upp­skrifta­bók­ina Le Pât­issier Royal Parisien frá ár­inu 1815.