Matur | mbl | 1.5.2025 | 18:00

Uppáhaldsdrykkur Hákons er „Duck Tails“

Ljósmynd/Hakon Hovdenak

Heiðurinn af helgarkokteilnum að þessu sinni á Hákon Freyr Hovdenak hjá Hovdenak Distillery eimingarhúsinu. En hann og eiginkona hans, Brynja Hjaltalín, hafa unnið til fjölda verðlauna fyrir vörur sínar undanfarin misseri og vakið athygli á erlendum vettvangi.

Frétt af mbl.is

Töfraginið frá Íslandi vann til gullverðlauna á World Gin Awards

Kokteillinn ber enska heitið Duck Tails og í honum er verðlaunaginið Stuðlaberg. Þessi drykkur er í miklu uppáhaldi hjá Hákoni og hann langaði til að deila uppskriftinni með lesendum matarvefsins í tilefni þess að það er að koma helgi.

Uppáhaldsdrykkur Hákons er „Duck Tails“

Duck Tails

50 ml Stuðlaberg Gin
25 ml appelsínusafi
25 ml sítrónusafi
25 ml svart tesíróp, sjá uppskrift fyrir neðan
15 ml rjómi
1 eggjahvíta
35 ml tonik
Klaki eftir þörfum

Aðferð:

Blandið saman öllu nema tónik í hristara og hristið vel í um 15 sekúndur með miklum klaka.
Sigtið svo úr hristaranum í hlutlaust glas, losið ykkur við klakann og hristið drykkinn aftur án klaka í um 20 sekúndur.
Hellið svo tónik í glasið sem drykkurinn á að vera borinn fram í og sigtið svo drykkinn úr hristaranum í glasið með tónikinu.
Þá ætti að myndast þétt froða og þá er drykkurinn klár.

Svart tesíróp

200 ml vatn
300 g sykur
2 pk. Earl Grey te

Aðferð:

Hitið vatnið í potti og látið suðu koma upp.
Takið svo pottinn af hellunni, bætið tepokunum út í og látið standa í lokuðum potti í um það bil 4 mínútur.
Bætið svo sykrinum út í og hrærið á lágum hita þar til sykurinn er bráðinn.