Matur | Morgunblaðið | 9.5.2025 | 12:30

Byrjaði að grilla 13 ára gömul í útilegu

Landsliðskokkurinn Kristín Birta Ólafsdóttir elskar að grilla og fagnar hverju tækifæri sem hún fær til þess. mbl.is/Eyþór

Kristín Birta Ólafsdóttir, matreiðslumeistari og landsliðskokkur, elskar að grilla og fagnar hverju tækifæri sem hún fær til þess.

Kristín Birta ætlar að gefa lesendum Morgunblaðsins uppskriftina að uppáhaldsgrillrétti sínum þar sem ribeye-steik er í aðalhlutverki ásamt meðlæti sem kitlar bragðlaukana.

Rauðvínsgljáinn er ljúffengur með og að setja chimichurri ofan á steikina er syndsamlega gott. mbl.is/Eyþór

Hún er 27 ára gömul og hjarta hennar slær í eldhúsinu á Hótel Reykjavík Grand þar sem hún starfar sem vaktstjóri. Þessa dagana undirbýr hún sig líka fyrir heimsmeistaramótið í matreiðslu sem fram undan er seint á næsta ári.

„Æfingar eru núna á tveggja vikna fresti, tvo daga í senn, en við fengum gott páskafrí sem var kærkomið. Annars erum við að æfa hvorn flokkinn til skiptis, það er að segja Chef’s Table og Restaurants of Nations. Mjög ólíkir flokkar og það hefur gengið mjög vel hingað til. Við eigum eftir tvær æfingar fyrir sumarfrí og síðan byrjum við aftur í ágúst,“ segir Kristín Birta sem er mjög bjartsýn á velgengni liðsins. „Við erum með mjög sterkt lið, frábæran þjálfara og ég er sannfærð um að við munum ná langt á heimsmeistaramótinu,“ segir hún með bjartsýnistón.

Langskemmtilegast að grilla

Þegar kemur að því að matreiða finnst Kristínu Birtu langskemmtilegast að grilla og möguleikarnir eru margir þegar kemur að útfærslum á grillréttum.

„Ég vann á steikhúsi sem vaktstjóri en ég fór líka á grillið á hverju kvöldi því mér finnst svo ótrúlega skemmtilegt að grilla. Hvort sem það var að grilla stórar steikur á beini, lambafille eða eitthvert annað kjöt eða fisk. Það er eitthvað við þessa eldunaraðferð, ég er alveg heilluð af henni.

Það er mismunandi bragð og áferð sem kemur á hráefnið eftir því hvort grillað er á kolum eða gasi, sem mér finnst spennandi. Það fer eftir stemningunni og eftir hverju ég er að leitast hverju sinni hvort ég vel kolin eða gasið. Ég grilla bæði á gasgrilli og rafmagnsgrilli, nema ef ég er í útilegu, þá eru kolin dregin fram og litla ferðagrillið,“ segir Kristín Birta sposk á svip.

Kristín Birta byrjaði snemma að grilla og hefur alltaf verið hrifin af þeirra eldunaraðferð. „Ég var í útilegu með fjölskyldunni, líklega 13 ára gömul, þegar ég man fyrst eftir að hafa fengið að grilla ein. Ég fékk þá að grilla hamborgara ofan í fólkið, það er fyrsta grillminningin mín sem poppar upp. Fjölskyldan mín er mikil ferðafjölskylda og í öllum útilegum er grillað á kvöldin. Þá er ég iðulega að sniglast í kringum grillið og hef gert frá því ég man eftir mér, enda finnst mér það svo gaman.“

Meðlætið skiptir líka máli

Meðlætið skiptir Kristínu Birtu ávallt miklu máli með öllu því sem grillað er. „Mér finnst meðlæti ávallt skipta máli með því sem er á boðstólum. Með nautasteik finnst mér klassískt að hafa kartöflu sem er vafin inn í álpappír með smjöri og salti, grillað grænmeti og síðan finnst mér ómissandi að vera með góða bearnaise-sósu eða rauðvínssósu eða jafnvel gott kryddsmjör. Ég set oft chimichurri ofan á steik eða fisk sem er grillaður, mér finnst það passa mjög vel saman.

Uppskriftin sem mig langar að deila með lesendum er ein af mínum uppáhalds en þegar ég vann í steikhúsinu grillaði ég endalaust mikið af nauta-ribeye og fannst æðislegt að hafa þetta meðlæti með. Ribeye er fituríkt og því er svo gott að hafa bragðgóða og ekki of feita sósu með, eins og chimichurri, og leyfa kjötinu að njóta sín. Síðan grilla ég aspas og er með ristaðar smælkikartöflur með timjan og hvítlauk, og laga smá rauðvínsgljáa.“

Nauta-ribeye með chimichurri, grilluðum aspas, ristuðum smælkikartöflum með timjan og hvítlauk, og rauðvínsgljáa. mbl.is/Eyþór

Byrjaði að grilla 13 ára gömul í útilegu

Nauta-ribeye með chimichurri, grilluðum aspas, ristuðum smælkikartöflum með timjan og hvítlauk, og rauðvínsgljáa

Nauta-ribeye

fyrir 2

2 stk. nauta-ribeye (250 g)
100 g smjör
salt eftir smekk

Aðferð:

Byrjið á því að setja ribeye-steikurnar á grillið og stráið salti yfir.
Þegar þykkar og góðar grillrendur hafa myndast snúið þá kjötinu við og penslið með brenndu smjöri og saltið eftir smekk.
Mikilvægt er að grilla steikurnar ekki of lengi til að þær ofeldist ekki, því steikurnar eru oft frekar þunnar.
Þegar ég hef grillað ribeye er það aldrei lengur en 5 mínútur á grillinu en að sjálfsögðu fer það eftir þykkt.
Fínt er að hafa kjarnhitamæli við höndina og hitamæla kjötið, annaðhvort meðan það er á grillinu eða þegar það hefur verið tekið af.
Látið kjötið hvíla í að minnsta kosti 7-8 mínútur áður en þið berið það fram.
Ef hafa á ribeye-ið medium-eldað, eins og ég mæli með, á hitamælirinn að sýna 55-56°C, eftir að kjötið hefur verið hvílt.
Því er betra að taka það frekar fyrr af grillinu en seinna, því maður getur alltaf skellt því aftur á grillið í smástund ef hitinn er ekki nógu hár inni í kjötinu.

Chimichurri

125 g ólífuolía
2 msk. rauðvínsedik
1 búnt söxuð steinselja
1 lítill chili, saxaður
4 hvítlauksrif, söxuð
1 tsk. þurrkað óreganó
1 tsk. gróft sjávarsalt
örlítið af svörtum pipar

Aðferð:

Setjið allt hráefnið í skál og blandið vel saman.
Setjið síðan í krukku og látið helst standa í kæli yfir nótt til að bragðið nái að fara út í olíuna.
Setjið síðan chimichurri ofan á kjötið eftir eldun.

Ristaðar smælkikartöflur

300 g smælkikartöflur
5-6 greinar af fersku timjan
3 hvítlauksgeirar
salt eftir smekk
repjuolía/annars konar olía

Aðferð:

Byrjið á því að skera kartöflurnar til helminga og setjið í bakka eða eldfast mót.
Saxið hvítlaukinn smátt og setjið út á kartöflurnar ásamt timjangreinunum.
Setjið salt og olíu út á og blandið öllu vel saman.
Bakið í ofni við 210°C hita í 12-15 mínútur, eða lengur ef þess þarf.

Grillaður aspas

4-6 stk. aspas
30 g smjör
salt eftir smekk

Aðferð:

Snyrtið aspasinn, brjótið endana framan á af og setjið hann síðan á grillið.
Bræðið smjörið og penslið síðan yfir aspasinn og stráið smá salti yfir.
Snúið honum við og haldið áfram að grilla, þar til hann er orðinn mjúkur.

Rauðvínsgljái

1 l rauðvín
1,5 l nautasoð
5 sneiðar beikon
6 stk. flúðasveppir
5 stk. íslenskar gulrætur
2 stilkar sellerí
3 laukar
5 hvítlauksrif

Aðferð:

Skerið beikon og allt grænmetið í sneiðar og/eða bita og svitið í potti í smá olíu.
Hellið rauðvíni út í og sjóðið niður um helming. Hellið síðan nautasoði út í og sjóðið niður um helming og látið malla.
Sigtið síðan sósuna yfir í annan pott og haldið áfram að sjóða niður þar til hún hefur náð þeirri þykkt sem þið viljið.
Kryddið til með salti og smá pipar eftir smekk.