„Að grilla er eitt það skemmtilegasta sem ég geri“
Setja bókamerki
Ilmurinn af grilluðum kræsingum er í loftinu þessa dagana og landsliðskokkarnir leika við hvern sinn fingur. Það á meðal Ísak Aron Jóhannsson.
Ísak er fyrirliði kokkalandsliðsins og lykilstarfsmaður hjá Múlakaffi. Hann er mikill grillari, að eigin sögn, og kemst í grillstuð þegar sólin skín. Hann gefur lesendum uppskrift að einum af uppáhaldsgrillréttum sínum, sem er nautalund borin fram með girnilegu meðlæti.
Ísak hefur verið í íslenska kokkalandsliðinu frá árinu 2019 en hann vann einnig keppnina um eftirrétt ársins árið 2022 og var í 2. sæti í keppninni um kokk ársins 2024. Hann stefnir á að vinna Kokk ársins 2026 ásamt því að leiða liðið til sigurs á heimsmeistaramótinu í Lúxemborg í nóvember á næsta ári.
Ísak var einnig fyrirliði þegar liðið tryggði sér 3. sætið á Ólympíuleikunum í fyrra, sem frægt er. „Kjarni þess liðs ætlar sér að keppa á næsta móti en öll reynsla skiptir gríðarlega miklu máli. Liðið æfir nú stíft áður en það fer í sumarfrí en byrjar síðan strax aftur í ágúst þegar allir hafa náð að hlaða batteríin.“
Langskemmtilegast að grilla þegar sólin skín
Aðspurður segist Ísak vera mikill grillari og þegar það er bongóblíða eins og síðustu daga sé grillið aðalmálið. Þegar útilegur eru annars vegar finnst honum líka ómissandi að vera með kolagrill við höndina.
„Að grilla er eitt það skemmtilegasta sem ég geri. Hvort sem það er steik, fiskur, grænmeti eða brauð þá er ég alltaf til, og það sama á við um hvernig viðrar, þótt auðvitað sé langskemmtilegast að grilla þegar sólin skín. Ég er mest hrifinn af kolum á grillið, það gefur svo skemmtilegt bragð, en gasgrillið er einnig góður kostur og hentugt ef á að henda einhverju fljótlegu á grillið,“ segir Ísak með bros á vör.
„Þegar ég er heima að grilla reyni ég að grilla allt meðlætið fyrir matarboðið og þá meina ég að búa til flatbrauð, grilla kartöflur og grænmeti svo dæmi séu tekin. Það er virkilega gaman og mér finnst gott að sleppa alveg við ofninn þótt hann komi sér stundum vel.
Í útilegum og þess háttar finnst mér einnig gaman að grilla meðlætið en þá á maður það samt stundum til að svindla og taka með sér tilbúið meðlæti sem er undirbúið heima fyrir ferðalagið, til að geta notið meira í útilegunni,“ bætir Ísak við og glottir.
„Einn af mínum uppáhaldsgrillréttum er grilluð nautalund ásamt chimichurri, grilluðum kartöflum, parmesan og grilluðu flatbrauði. Þessi réttur er tilvalinn til að deila með vinum og fjölskyldum, rétturinn er framreiddur á skurðarbretti þar sem lundin er skorin og chimichurri-sósu, rifnum parmesan og grilluðum kartöflum er bætt við. Flatbrauðið kemur síðan sterkt inn sem afbragðsfylling með nógu af smjöri og salti.“
„Að grilla er eitt það skemmtilegasta sem ég geri“
Nautalund með chimichurri, grilluðum kartöflum, parmesan og flatbrauði
Fyrir 4
Grilluð nautalund
- 1 stk. nautalund, 1,2 kg
- verkuð olía eftir smekk
- salt og pipar eftir smekk
Aðferð:
- Takið nautalundina úr kæli a.m.k. klukkutíma áður en á að grilla hana.
- Veltið henni upp úr olíu, salti og pipar.
- Skellið lundinni á grillið og fáið flottar rendur í hana, setjið hana næst í eldfast mót og skellið henni inn í ofn á 120°C.
- Þegar kjarnhitamælirinn pípir í 52°C, takið þá lundina út og leyfið að hvíla í 10-15 mínútur.
- Skerið lundina í fernt þversum og næst í litla bita, dreifið síðan chimichurri yfir bitana ásamt grilluðum kartöflum, rifnum parmesan og sjávarsalti.
Chimichurri
- 100 g steinselja
- 100 g kóríander
- 2 stk. chilli, án fræja
- 3 stk. hvítlauksgeirar
- 1⁄2 lítill rauðlaukur
- 200 ml ólífuolía
- 50 ml rauðvínsedik
- sjávarsalt, eftir smekk
Aðferð:
- Saxið steinselju, kóríander, chilli, rauðlauk og hvítlauksgeira smátt og blandið saman í skál ásamt rest af hráefnum.
- Smakkið til með sjávarsalti og leyfið sósunni að jafna sig inni í kæli í a.m.k. 8 klukkustundir.
Grillaðar kartöflur
- 600 g smáar kartöflur eða smælki
- ólífuolía eftir smekk
- salt og pipar eftir smekk
- smjörklípa
- parmesanostur eftir smekk
Aðferð:
- Byrjið á því að hita ofninn í 180°C.
- Setjið kartöflurnar í eldfast mót með ólífuolíu og kryddið til með salti og pipar.
- Setjið inn í ofn og bakið við 180°C í 30 mínútur.
- Þetta er tilvalið að gera daginn áður ef t.d. á að fara í útilegu.
- Hitið næst grillið vel og veltið kartöflum aftur upp úr olíu, skellið kartöflunum á grillið og grillið þar til þær eru orðnar stökkar og fallegar.
- Gott er að setja kartöflurnar í skál og klára þær með því að velta þeim upp úr meira salti og jafnvel smjörklípu.
- Í lokin er gott að setja smá rifinn parmesanost yfir.
Grillað flatbrauð
- 400 g hveiti
- 1 tsk. salt
- 1 tsk. ger
- 11⁄4 bolli volgt vatn
- 1⁄4 bolli ólífuolía, ásamt meiru til að pensla
- sjávarsalt
- 4 hvítlauksgeirar, saxaðir smátt
- 30 g steinselja, söxuð smátt
Aðferð:
- Byrjið á því að taka til stóra skál og setjið í hana hveiti, salt og ger og blandið saman.
- Bætið við volgu vatni og olíu. Blandið vel saman með deighræra/hnoðara í hrærivél á miðlungshraða í 3-4 mínútur eða þar til deigið er hætt að límast við skálina.
- Leyfið deiginu að hvíla í 30-60 mínútur.
- Skiptið deiginu í 4 hluta og fletjið út í hringi, penslið með ólífuolíu og söxuðum hvítlauk.
- Skellið síðan deiginu á heitt grillið og látið vera í 1 mínútu á hvorri hlið á vel heitu grilli. Það á að duga.
- Þegar þið takið brauðið af grillinu dreifið þá saxaðri steinselju yfir það ásamt sjávarsalti og þá eruð þið komin með grillað flatbrauð.
Meintur árásarmaður úrskurðaður í gæsluvarðhald
Bóndinn í Hvalfirði ekki sáttur við myndina
Klerkarnir með kjarnavopn ógn við heimsfriðinn
„Mjög, mjög nálægt því að ná markmiðunum“
Trump hótar frekari árásum
Framhaldið veltur á viðbrögðum Írana
Ísland slegist um efsta sæti í verðlagi í áraraðir
„Vandinn liggur augljóslega hjá Ísrael“