Matur | Veitingastaðir | mbl | 3.6.2025 | 16:30

Íslenskt „pop up“ með sjö rétta matseðil í Japansheimsókn forseta Íslands

Forseti Íslands, Halla Tómasdóttir og eiginmaður hennar, Björn Skúlason og Hafliði Halldórsson ásamt starfsmönnum á District Brasserie Bar- Lounge. Ljósmynd/Aðsend

Mikið var um dýrðir þegar íslenskt „pop up“ með sjö rétta matseðil var haldið í Japan, Tokyo, í tilefni Taste Of Iceland viðburðar og heimsóknar Höllu Tómasdóttur forseta Íslands.

Viðburðurinn var haldinn á District - Brasserie Bar-Lounge, Kimpton Hotel Shinjuku Tokyo.

Íslandsstofa ásamt utanríkisþjónustunni og sendiráði Íslands í Japan skipulagði Taste Of Iceland viðburð í Tokyo sem fram fór dagana 30.-31. maí síðastliðinn en í sömu viku var Íslandsdagur á World Expo í Osaka þar sem forseti Íslands, Halla Tómasdóttir, var heiðursgestur.

Hannaður í kringum íslenskt hágæðahráefni

Á dagskrá Taste Of Iceland voru ýmsir viðburðir, tónlist, myndlistasýningar, fyrirlestrar og síðast en ekki síst íslenskur matur. Matreiðslumeistarinn Hafliði Halldórsson sá um matinn í samstarfi við yfirkokkinn Yuho Hozumi á veitingahúsinu District Brasserie Bar – Lounge á Kimpton-hótelinu í Shinjuku-hverfinu.

Antoine Yoshida veitingastjóri staðarins, Hafliði og Chef Yuho Hozumi. Ljósmynd/Aðsend

„Það var afskaplega gaman að fá tækifæri til að taka þátt í þessu skemmtilega verkefni í Japan og kynna íslenska matargerð og hráefnin fyrir Japönum sem eru með eindæmum meðvitaðir um gæðin á hráefni og mat. Við buðum upp á sjö rétta matseðil á veitingastaðnum tvö kvöld og var uppselt báða dagana. Sami matseðill og fleiri réttir voru svo einnig í boði í móttökum fyrir blaðamenn og aðra gesti fyrr í vikunni,“ segir Hafliði Halldórsson.

Að sögn Hafliða var matseðillinn hannaður í kringum íslensk hágæðahráefni sem eru seld í Japan, sjávarfang frá Icelandic Seafood, íslenskt lambakjöt og Ísey-skyr sem er framleitt í Japan með leyfi frá MS.

„Samstarfið við Kimpton, sem er tiltölulega lítið „Boutique“ hótel, var framúrskarandi gott, þar eru flinkir fagmenn í forsvari og þjónusta við gestina er af hæsta klassa,“ bætir Hafliði við.

Hafliði og Chef Yuho Hozumi að störfum. Ljósmynd/Aðsend

Svona leit matseðillinn út

Loðnuhrogn með sítrus & grásleppuhrogn borin fram með stökkri vöfflu, sýrðum rjóma og rauðlauk
Grafin og gljáð grálúða, sýrð fjörugrös, graslauks-majónes og stökkt rúgbrauð
Gullkarfi „Matsukasa Yaki“, risotto með wasabi og yuzu-froða
Lambaseyði, hægeldaður lambaframpartur og shiitake-sveppir
Grillað lambahjarta, „Sansho“ piparsósa, karsamauk og „Urui“ lauf
Steiktur lambaframhryggur, kartöflumús, lambasoðsósa og ertu-sprettur
Ísey skyr, hvítsúkkulaðimús, sítrónumarens, mysukaramella og jarðarber

Hægt er að sjá meira um gleðina hér.

Hér fyrir neðan má sjá svipmyndir af réttunum og stemningunni í eldhúsinu.